Author: voktun_5lyjfcb5

Desemberuppbót 2011

	Desemb.uppbót	Álag gr. 2011	Eingr.1/2 2012	samtals
Almenni samningur milli SGS og SA			48.800 kr.	15.000 kr.		63.800 kr.
Samningur f.h. Ríkissjóðs og SGS			48.800 kr.	15.000 kr.		63.800 kr.
Samingur SGS og Launanefndar sveitarf.			75.500 kr.		25.000 kr.	100.500 kr.
Samningur SA vegna Sólheima við Báruna, stéttarfélag			48.800 kr.	15.000 kr.		63.800 kr.
Samningur Dvalar og hjúkr.h.Kumbaravogs			75.500 kr.		25.000 kr.	100.500 kr.
Vinnustaðasamningur Mjólkurbús Flóam.			48.800 kr.	15.000 kr.		63.800 kr.
Bændsamtök Íslands og SGS			48.800 kr.	15.000 kr.		63.800 kr.
Landsamband smábátaeigenda og SGS			48.800 kr.	15.000 kr.		63.800 kr.
Landsvirkjun og SGS			82.775 kr.	15.000 kr.		97.775 kr.

ATH

Á árinu 2011 greiðist sérstak álag á desemberuppbót kr. 15.000-.

Almenni samningur milli SGS og SA:
Uppbótin greiðist eigi síðar en 15. desember ár hvert, miðað við starfshlutfall og starfstíma, öllum starfsmönnum sem verið hafa samfellt í starfi hjá atvinnurekanda í 12 vikur á síðustu12 mánuðum eða eru í starfi fyrstu viku í desember.

Kjarasamningur fjármálaráðherra f.h. ríkissjóðs og SA:
Starfsmaður sem er við störf í fyrstu viku nóvembermánaðar skal fá greidda desemberuppbót 1. desember ár hvert miðað við fullt starf tímabilið 1. janúar til 31. október. Desemberuppbót er föst krónutala og tekur ekki hækkunumskv. öðrum ákvæðum kjarasamningsins. Á desemberuppbót reiknast ekki orlofsfé. Hafi starfsmaðurinn gegnt hlutastarfi eða unnið hluta úr ári, skal hann fá greitt miðað við starfshlutfall á framangreindu tímabili. Á sama hátt skal einnig starfsmaður sem látið hefur af starfi en starfað hefur samfellt í a.m.k. 3 mánuði (13 vikur) á árinu, fá greidda desemberuppbót, miðað við starfstíma og starfshlutfall. Sama gildir þótt starfsmaður sé frástörfum vegna veikinda eftir að greiðsluskyldu stofnunar lýkur eða í allt að 6 mánuði vegna fæðingarorlofs.

Kjarasamningur Sambands íslenskra sveitarfélaga og SA:
Starfsmaður í fullu starfi fær greidda desemberuppbót (persónuuppbót) 1. desember ár hvert. Með fullu starfi er átt við 100% starf tímabilið 1. janúar til 30. nóvember sama ár. Hafi starfsmaður gegnt hlutastarfi eða starfað hluta úr ári, skal hann fá greitt miðað við starfshlutfall og/eða starfstíma, þó þannig að hann hafi starfað samfellt a.m.k. frá 1. september það ár.
Starfsmaður sem lætur af störfum á árinu, en hafði þá starfað samfellt í a.m.k. 6 mánuði skal einnig fá greidda desemberuppbót miðað við starfstíma og starfshlutfall á árinu. Hlutfall skv. þessari málsgrein er reiknað sem hlutfall af fullri vinnu (100%) í 12 mánuði á almanaksárinu af síðast gildandi desemberuppbót.

Eru háir vextir og verðtrygging náttúrulögmál á Íslandi

Rétt er að vekja athygli á þessum fundi sem Alþýðusanband Íslands boðar til. Þessi fundur er öllum opinn og hvetjum við félagsmenn til að mæta.

Þetta verður fyrsti fundurinn af 3-4 um verðtrygginguna, vexti og krónuna. Sá næsti er 8. desember og svo höldum við áfram í janúar. Á þessum fyrstu tveimur fundum verður farið yfir málin í sögulegu samhengi og bornir saman ólíkir kostir í lána- og gjaldeyrismálum.

Opinn fundur ASÍ

Alþýðusamband Íslands boðar til opinna funda um vexti og verðtryggingu á Grand Hótel Reykjavík. Fyrsti fundurinn er fimmtudaginn 1. desember kl. 17 og ber hann yfirskriftina; Eru háir vextir og verðtrygging náttúrulögmál á Íslandi?

Þetta er fyrri fundurinn af tveimur hjá ASÍ nú í desember en svo er meinging að halda áfram í desember. Sá næsti er 8. desember og hann ber yfirskriftina; Hvað kostar krónan heimilin í landinu?

Á þessum tveimur fundum verður farið yfir málin í sögulegu samhengi og bornir saman ólíkir kostir í lána- og gjaldeyrismálum.

Hér má sjá nánari dagskrá þessara funda Alþýðusambandsins

Námskeið í gerð aðventukransa

Í byrjun jólaundirbúnings buðu Verslunarmannafélag Suðurlands, Báran stéttarfélag og Félag iðn- og tæknigreina félagsmönnum á jólaföndurnámskeið. Leiðbeinandi á námskeiðinu var Erla Björg Arnardóttir frá Grænna landi á Flúðum. Á námskeiðinu lærðu þátttakendur að útbúa eigin jólaskreytingar og þar urðu meðal annars til margir glæsilegir aðventukransar. Þátttakendur voru sammála um að námskeiðið hafi verið skemmtilegt og lærdómsríkt.

Frá samstöðuhópi um Heilbrigðisstofnun Suðurland

Samstöðuhópur um HSu var á fundi með velferðarráðherra Guðbjarti Hannessyni ásamt starfsfólki og stjórnendum Heilbrigðisstofnunar Suðurlands þriðjudaginn 15. nóvember sl. Á fundinum fór ráðherra yfir helstu kennitölur heilbrigðismála síðastliðin ár jafnframt því að útskýra hverjar breytingar hefðu orðið á málaflokknum frá efnahagshruninu.
Fjölmargar fyrirspurnir komu fram á fundinum og ljóst að Sunnlendingar hafa miklar áhyggjur af framtíðarhorfum Heilbrigðisstofnunarinnar. Margir fundarmanna lýstu áhyggjum sínum af boðuðum niðurskurði og töldu að nú þegar væri of langt gengið. Fram kom í máli heilbrigðisráðherra að stefnt væri að því að halda skurðstofu HSu áfram opinni á dagvinnutíma og fagnar samstöðuhópurinn því. Hópurinn telur einsýnt að tekið verði tillit til þess þegar fyrirhugaðar breytingar á húsnæði stofnunarinnar verða skipulagðar jafnframt því að tækjabúnaður verði uppfærður.

Ráðherra sagði einnig að rétt væri að framlag til sjúkratrygginga hefði hækkað þrátt fyrir niðurskurð á öllum öðrum sviðum og vekur það spurningar um hvort verið sé að flytja kostnað til sérfræðinga í Reykjavík. Ekki fengust um það skýr svör frá ráðherra.

Hann taldi að með þeim niðurskurði sem nú er boðaður væri botninum náð og ekki yrði um frekari niðurskurð að ræða á fjárlögum 2013.

Samstöðuhópur um Heilbrigðisstofnun Suðurlands lýsir miklum áhyggjum af boðuðum niðurskurði ofan á þann sem nú þegar hefur skert þjónustu við Sunnlendinga verulega. Samstöðuhópurinn telur að að sá sparnaður sem velferðaráðuneytið telur sig ná fram með boðuðum niðurskurði komi að miklu leiti fram í auknum kostnaði þeirra sem þjónustuna þurfi að nota.

Jólaföndurnámskeið

Stéttarfélögin á Austurvegi 56, Selfossi bjóða félagsmönnum sínum á jólaföndurnámskeið í borðakransagerð, hurðakransagerð (aðventukrans) og grenilengjugerð Leiðbeinandi er Erla Björg Arnardóttir frá Grænna landi á Flúðum.

 

 

Borðakransa- og hurðakransagerð efnisgjald kr. 3.000,-
21. nóv. kl. 20:00

22. nóv. kl. 18:00

 

Grenilengjugerð efnisgjald kr. 3.500,-

23. nóv. kl. 20:00

24. nóv. kl. 18:00

 

Skráning fer fram á Þjónustuskrifstofu stéttarfélaganna á Suðurlandi í síma 480 5000.

Einnig er hægt að skrá sig á hugrun@vms.is og thorunnth@midja.is

Síðasti skráningardagur er 17. nóvember nk

Nýr dómur – Greitt skal fyrir auknar starfsskyldur

Hæstiréttur komst að þeirri niðurstöðu í dómi frá 3.11 sl. að atvinnurekanda, sem hyggst auka við starfsskyldur starfsmanns, beri annað af tvennu að gera það með því að eiga frumkvæði að breytingum á ráðningarsamningi eða tilkynna það skriflega eins og kjarasamningar áskilja. Þar sem hann gerði hvorugt öðlaðist starfsmaðurinn rétt til aukagreiðslna vegna hinna nýju starfsskyldna. Í málinu var einnig deilt um það hvort starfsmaðurinn ætti rétt á greiðslu bifreiðastyrks á uppsagnarfresti þar sem ekki var krafist vinnuframlags hans og komst Hæstiréttur að þeirri niðurstöðu að svo væri.

Hæstiréttur komst að þeirri niðurstöðu í dómifrá 3.11 sl. að atvinnurekanda, sem hyggst auka við starfsskyldur starfsmanns, beri annað af tvennu að gera það með því að eiga frumkvæði að breytingum á ráðningarsamningi eða tilkynna það skriflega eins og kjarasamningar áskilja. Þar sem hann gerði hvorugt öðlaðist starfsmaðurinn rétt til aukagreiðslna vegna hinna nýju starfsskyldna. Í málinu var einnig deilt um það hvort starfsmaðurinn ætti rétt á greiðslu bifreiðastyrks á uppsagnarfresti þar sem ekki var krafist vinnuframlags hans og komst Hæstiréttur að þeirri niðurstöðu að svo væri.

Dómurinn er reifaður þannig á vef Hæstaréttar:

„I krafði H ehf. um bakvaktaálag vegna símavaktar, sem henni var gert að sinna í tengslum við vinnu sína fyrir H ehf., auk þess sem hún gerði kröfu um greiðslu bifreiðastyrks á meðan á uppsagnarfresti stóð. Símavaktinni var komið á nokkru eftir að I hóf störf og deildu aðilar um það hvort símavaktin væri hluti af starfsskyldum hennar samkvæmt ráðningarsamningi og starfslýsingu eða hvort um bakvaktir í skilningi kjarasamninga hefði verið að ræða. Var það niðurstaða Hæstaréttar að H ehf. hefði ekki fært sönnur á þá staðhæfingu sína að vinnuskyldan hefði rúmast innan starfsskyldna I samkvæmt ráðningarsamningi. Við breytingu á starfstilhögun I hefði félagið hvorki haft frumkvæði að því að breyta ráðningarsamningi hennar í þá veru að þar kæmi fram að hin breytta tilhögun félli undir starfsskyldur hennar, án þess að greiðsla kæmi fyrir, né greint henni frá því með skriflegum hætti, svo sem áskilið var í kjarasamningi. Var krafa I um greiðslu bakvaktaálags því tekin til greina, en hún lækkuð verulega. Þá féllst Hæstiréttur á það með héraðsdómi að H ehf. skyldi greiða I umsamin bifreiðahlunnindi á uppsagnarfresti.“

Megin niðurstaða Hæstaréttar felur það í sér, að atvinnurekendur bera hallan af því ef ekki liggur fyrir skrifleg og skýr sönnum um það, hvort tilteknar starfsskyldur sem ella væru greiðsluskyldar, líkt og bakvaktarálög sem skilgreind eru sérstaklega í kjarasamningum, séu hluti af þeim starfsskyldum sem tillit hefur tekið til við  heildarákvörðun launa.

Rökstuðning sinn sækir Hæstiréttur m.a. til tilskipunar Evrópusambandsins nr. 91/533/EBE um skriflega staðfestingu ráðningar. Í dóminum segir:

„Í 68. gr. samningsins um Evrópska efnahagssvæðið, sbr. 1. mgr. 2. gr. laga nr. 2/1993, segir að á sviði vinnulöggjafar skuli samningsaðilar gera nauðsynlegar ráðstafanir, sem tilgreindar séu í XVIII. viðauka við samninginn, til að tryggja góða framkvæmd hans. Í samræmi við þetta samningsákvæði hefur tilskipun Evrópusambandsins nr. 91/533/EBE um skyldu vinnuveitanda að skýra launþegum frá samningsskilmálum eða ráðningarfyrirkomulagi tekið gildi hér á landi, sbr. auglýsingu félagsmálaráðuneytisins nr. 503/1997. Í auglýsingunni er tekið fram að ákvæðum tilskipunarinnar hafi verið hrint í framkvæmd með kjarasamningum aðildarsamtaka vinnumarkaðarins og teljist ákvæðin lágmarkskjör á íslenskum vinnumarkaði samkvæmt 1. gr. laga nr. 55/1980 um starfskjör launafólks og skyldutryggingu lífeyrisréttinda, sbr. 5. gr. laga nr. 69/1993.“

Samhljóða ákvæði byggð á fyrrgreindri tilskipun um skriflega ráðningarsamninga og skriflega staðfestingu ráðningar eru síðan í öllum kjarasamningum aðildarsamtaka ASÍ. Þar er skýrt tekið fram að allar breytingar á ráðningarkjörum, umfram það sem leiðir af lögum eða kjarasamningum, skuli staðfesta með breytingum á ráðningarsamningi eða skriflegri staðfestingu. Hafi atvinnurekendur ekki frumkvæði að því bera þeir hallan af sönnum um að tillit hafi verið tekið til hinna breyttu starfsskyldna við heildarákvörðun launa.

Tekið af heimasíðu ASÍ

Bónus, fyrirtæki ársins á Suðurlandi

Bónus var í dag valið fyrirtæki ársins 2011 á Suðurlandi af félagsmönnum Verslunarmannafélags Suðurlands og Bárunnar, stéttarfélags. Niðurstaðan var kynnt í nýrri verslun fyrirtækisins við Larsenstræti á Selfossi. Þór Hreinsson skrifstofustjóri Þjónustuskrifstofu stéttarfélaganna á Suðurlandi afhenti verslunarstjóra fyrirtækisins viðurkenningarskjal og einnig fengu starfsmenn Bónus blómakörfu við það tækifæri. Fram kom í máli hans að mannauður er dýrmætasti hluti hvers fyrirtækis og að Bónus væri vel að verðlaununum komið. Markmið könnunarinnar er að gefa starfsmönnum tækifæri að koma skoðunum sínum á framfæri og skapa þannig grundvöll til að ræða vinnuaðstæður og kjör.

Sendur var spurningalisti til allra félagsmanna Verslunarmannafélags Suðurlands og Bárunnar, stéttarfélags. Þátttakendur voru beðnir að leggja mat á lykilþætti í sínu starfsumhverfi. Könnuninni er meðal annars ætlað að mæla hversu vel svarendum líður í vinnunni, stjórnun, starfsanda og vinnuaðstöðu. Fyrirhugað er að gera þessa könnun árlega framvegis. Alls svöruðu starfsmenn 33 fyrirtækja á félagssvæði félaganna könnuninni. Eftirtalin fyrirtæki skoruðu hæst hjá starfsfólkinu:

1. Bónus, Selfossi

2. Olís, Selfossi

3. Tölvu- og rafeindaþjónusta Suðurlands

4. N1, Suðurlandi

5. Hótel Selfoss

6. Pylsuvagninn Selfossi

7. Jötunn vélar

8. Dvalar- og hjúkrunarheimiliðKumbaravogur

9. Heilbrigðisstofnun Suðurlands

10. Húsasmiðjan

Launþegar athugið

Rétt þykir að árétta að samkvæmt síðustu kjarasamningum skal greiða álag á desemberuppbót. Allar upplýsingar eru undir flipanum Kjaramál hér á síðunni

Samfélagslegt tap vegna svartrar vinnu smærri fyrirtækja 13,8 milljarðar á ári

Í tengslum við gerð kjarasamninga í vor skapaðist umræða um hvernig minnka mætti svarta atvinnustarsemi og bæta viðskiptahætti í landinu. Árangurinn var átaksverkefnið „Leggur þú þitt af mörkum?“ sem unnið var í samvinnu Ríkisskattstjóra (RSK), ASÍ og SA. Heimsótt voru yfir tvö þúsund lítil og meðalstór fyrirtæki í sumar og fengu 55% þeirra athugasemdir. Rætt var við sex þúsund starfsmenn og reyndust 12% þeirra vinna svart, flestir á Vestfjörðum. Tap þjóðarbúsins vegna svartrar atvinnustarfssemi nemur 13,8 milljörðum á ári.

Ákveðið var að afmarka átakið við lítil og meðalstór fyrirtæki með ársveltu undir 1 milljarði króna, skv. gögnum RSK. Þá var ákveðið að beina skoðuninni að því hvernig þeir aðilar sem voru heimsóttir uppfylltu kröfur er lúta að:

a) Tekjuskráningu og skilum á virðisaukaskatti.

b) Launa- og starfssambandi fyrirtækja og starfsmanna.

c) Réttindum og skyldum fyrirtækja og starfsmanna.

d) Vinnustaðaskírteinum þar sem við átti.

Af hálfu samstarfsaðilanna var jafnframt ákveðið að leggja sérstaka áherslu á þá þætti sem lúta að svartri vinnu og afleiðingum hennar og greina frekar þær upplýsingar sem átakið veitti um þann þátt. Rík áhersla var lögð á að nálgast viðfangsefnið með jákvæðum formerkjum, þar sem meginmarkmiðið væri að kanna aðstæður, veita ráðgjöf og fræðslu um viðeigandi reglur og lagaramma og hvetja bæði atvinnurekendur og launafólk til að gera nauðsynlegar úrbætur ef þurfa þætti.

Átakið hófst 15. júní 2011 og stóð formlega til loka ágústmánaðar, en frekari eftirfylgni og úrvinnsla gagna hefur staðið yfir síðan. Meðan á átakinu stóð voru 2.024 lögaðilar kannaðir með heimsóknum á 2.136 starfstöðvar um land allt. Þá voru skráðir 6.167 starfsmenn í þessum heimsóknum. Að jafnaði voru fjögur eftirlitsteymi að störfum, skipuð þremur til fjórum einstaklingum hvert og reynt að hafa einn frá hverjum samstarfsaðilanna í hverju teymi.

Helstu niðurstöður:

Áberandi var hversu mikið þekkingarleysi er á markmiðum og innihaldi laga og reglugerða um tekjuskráningu, virðisaukaskatt og staðgreiðslu sem og á kjarasamningum. Þetta eru alvarlegir áhættuþættir sem líklegt er að leiði til rangrar meðferðar á sköttum, gjöldum og kjarasamningsbundnum réttindum. Reyndust vera einhver frávik frá réttri framkvæmd hjá yfir helmingi fyrirtækja sem heimsótt voru eða í 55,3% tilfella.

Niðurstöður átaksins benda til þess að vantaldir skattar, gjöld og tekjur sem ekki skila sér til réttra aðila og tengjast svartri vinnu séu á ársgrunni 13,8 milljarðar króna, eingöngu vegna fyrirtækja sem eru með veltu undir 1 milljarði króna á ári.

Svört vinna er 12% – Niðurstaðan var að 737 (12,0%) einstaklingar af 6.167 starfsmönnum sem skráðir voru reyndust vera í svartri vinnu. Þessir starfsmenn voru hjá 16,0% fyrirtækja sem heimsótt voru.

Hvar eru flestir í svartri vinnu? – Niðurstaða þessa verkefnis sýnir að svört vinna er yfirgnæfandi mest í rekstri með veltu undir 150 milljónum króna á ári. Þar er að finna 91% af þeirri svörtu vinnu sem mælist samkvæmt reiknilíkani ríkisskattstjóra eða samtals 12,6 milljarðar.3

Töpuð réttindi – Ekki aðeins skila tekjur sér ekki í sameiginlega sjóði landsmanna, heldur eru afleiðingarnar lakari kjör einstaklinga og töpuð réttindi á vinnumarkaði.

Skortur á úrræðum – Til þess að stærsti hlutinn af þeim 13,8 milljörðum skili sér þurfa eftirlitsaðilar virkari úrræði. Rannsóknarúrræði eru til staðar, en þau henta illa í einföldum eftirlitsstörfum eins og þeim sem átakið beindist að. Skortur er á eftirlitsúrræðum sem beinast að einföldum brotum á lögbundnu verklagi við tekjuskráningu, skilum á virðisaukaskatti og launatengdum gjöldum. Þörf er lagabreytinga sem gætu skilað milljörðum á hverju ári í sameiginlega sjóði.

Þekkingarleysi – Áberandi er hve skortir á þekkingu á markmiðum og innihaldi laga og reglugerða um tekjuskráningu, virðisaukaskatt og staðgreiðslu, sem og á efni kjarasamninga.

 

 

Tekið af heimasíðu ASÍ

50–81% verðmunur á umfelgun

Nú þegar vetur er að ganga í garð þurfa bíleigendur sem ekki aka á heilsársdekkjum að huga að dekkjaskiptum, en frá 1. nóvember er leyfanlegt að setja nagladekkin undir. Verðlagseftirlit ASÍ gerði verðkönnun á skiptingu, umfelgun og jafnvægisstillingu fyrir nokkrar tegundir bíla hjá 37 hjólbarðaverkstæðum víðsvegar um landið sl. mánudag. KvikkFix í Kópavogi var með lægsta verðið í könnuninni á þjónustu fyrir smábíla og meðalstóra fólksbíla, en allt að 3.300 kr. verðmunur var á þeirri þjónustu á milli verkstæða eða 72%.  

Mestur verðmunur í könnuninni var á þjónustu við dekkjaskipti á jeppa (t.d. Mishubishi)  með 18´´ áfelgum(265/60R18) sem var ódýrust á 6.913 kr. hjá Bifreiðaverkstæði SB á Ísafirði en dýrust á 12.530 kr. hjá Gúmmívinnslunni í Reykjavík, verðmunurinn var 5.617 kr. eða 81%.

Minnstur verðmunur í könnuninni var á þjónustu við dekkjaskipti undir smábíl og minni meðalbíl á 14 og 15´´ stálfelgu (175/65R14 og 195/65R15), sem var ódýrust á 4.650 kr. hjá KvikkFix í Kópavogi, en dýrust á 6.990 kr. hjá umboðsaðila Toyota á Selfossi, verðmunurinn var 2.340 kr. eða 50%. Fyrir álfelgu af sömu stærð er þjónustan ódýrust á 4.650 kr. hjá KvikkFix og dýrust á 7.450 hjá Pústþjónustu BJB í Hafnarfirði, verðmunurinn var 2.800 kr. eða 60%.

Verð á þjónustu fyrir meðalbíl (t.d. Subaru Legacy) á 16´´ stál og álfelgum(205/55R16) var ódýrust á 4.650 kr. hjá KvikkFix í Kópavogi en dýrust á 7.980 kr. hjá Kletti  í Reykjavík, verðmunurinn var 3.330 kr. eða 72%.

Skipting, umfelgun og jafnvægisstilling fyrir jeppling á 16´´ álfelgum(225/70R16) var ódýrust á 5.900 kr. hjá Toyota á Akureyri og dýrust á 9.510 kr. hjá Gúmmívinnslunni Reykjavík, verðmunurinn var 3.610 kr. eða 61%. Fyrir bíl með stálfelgu af sömu stærð var þjónustan ódýrust á 5.500 kr. hjá Dekkjalagernum Selfossi og dýrust á 8.694 kr. hjá Bifreiðaverkstæði Reykjavíkur, verðmunurinn var 3.194 eða 58%. 

Allt að 15% hækkun frá síðustu könnun

Sex hjólbarðaverkstæði hafa hækkað hjá sér verðið á þjónustu við dekkjaskipti á meðalbíl með 16´´ álfelgu(205/55R16) frá því í apríl. Mesta hækkunin var hjá Kvikk-þjónustunni í Hafnarfirði 15% og næst mesta hækkunin var hjá Klöpp í Reykjavík 9%. Verð þjónustunnar hefur lækkað hjá 8 þjónustuaðilum síðan í vor, mesta lækkunin var hjá Toyota Akureyri 22%, Nýbarða Garðabæ 18% og Pitstop 15%.

Á heimasíðu ASÍ má sjá nánari niðurstöður í verðkönnun verðlagseftirlits ASÍ á skiptingu, umfelgun og jafnvægisstillingu.

Dekkjahöllin, Hjólbarðaverkstæði Ísafjarðar og Hjólbarðaþjónusta Magnúsar Selfossi neituðu þátttöku í verðkönnuninni

Kannað var verð á þjónustu við dekkjaskiptingu, umfelgun og jafnvægisstillingu á álfelgum og stálfelgum af stærðum 14,15, 16 og 18´´ á 37 hjólbarðaverkstæðum í Reykjavík, Kópavogi, Hafnarfirði, Garðabæ, Akureyri, Egilsstöðum, Ísafirði og Selfossi.

Hér er aðeins um beinan verðsamanburð á þjónustu að ræða en ekki var lagt mat á gæði eða þjónustu söluaðila.

Óheimilt er að vitna í könnunina í auglýsingum og við sölu nema með heimild ASÍ.

Tekið af heimasíðu ASÍ