Category: Fréttir

Oftast 30-60% verðmunur á jólabókum

Verðlagseftirlit ASÍ gerði verðsamanburð á jólabókum í 12 bókabúðum og dagvöruverslunum  víðsvegar um landið sl. þriðjudag. Kannað var verð á 63 bókatitlum sem gefnir hafa verið út á árinu.  Mikill verðmunur var á milli verslana. Hann var í flestum tilvikum 30-60% á hæsta og lægsta verði. Lægsta verðið var oftast að finna í versluninni Bónus eða á 25 titlum af 63,  en sú verslun var einnig með fæsta bókatitla á boðstólum eða aðeins 29 af þeim 63 sem skoðaðir voru. Hæsta verðið var oftast að finna í bókabúðinni Iðu Lækjargötu eða í um helmingi tilvika. Bókabúðin Penninn- Eymundsson neitaði þátttöku í könnuninni.

Bónus var oftast með lægsta verðið á 25 titlum af 63, þar á eftir var Bóksala stúdenta með lægsta verðið á 16 titlum af 63. Iða Lækjagötu var oftast með hæsta verðið í könnuninni á 32 titlum af 63. Bóksala stúdenta og Mál og menning Laugavegi voru með hæsta verðið á 29 titlum af 63.

Mestur verðmunur í könnuninni var á sögubókinni Dauðinn í Dumbshafi, sem var á á 4.193 kr. í Bónus en dýrust var hún í Hagkaup á 6.980 kr. sem er 2.787 kr. verðmunur eða 66%. Þýdda skáldverkið Djöflanýlendan var á lægsta verðinu hjá Nettó á 3.518 kr. en dýrust hjá Máli og menningu á 5.790 kr. sem er 2.272 kr. verðmunur eða 65%. Einnig var mikill verðmunur á matreiðslubókinni, Eldum íslenskt með kokkalandsliðinu. Hún kostaði 3.241 kr. í Bónus en var dýrust í Hagkaup á 5.199 kr. sem er 1.958 kr. verðmunur eða 60%.

Minnstur verðmunur í könnuninni var á hljóðbókinni, Sólskinsbarn eftir Huldu Ólafsdóttur sem kostaði ýmist 2.490 kr. eða 2.499 kr. þar sem að hún var fáanleg. Mun meiri verðmunur var á ljóðabókinni Ísafjörður ægifagur sem var á lægsta verðinu hjá Office 1 2.039 kr. en dýrust hjá Griffli á 2.207 kr. sem var 8% verðmunur.

Mikill verðmunur á vinsælum titlum

Sem dæmi um mikinn verðmun á vinsælum titlum má nefna að skáldsagan Hjarta mannsins eftir Jón Kalman var ódýrust á 3.699 kr. hjá Krónunni en dýrust á 5.880 kr. hjá A4, verðmunurinn er 2.181 kr. eða 59%. Einnig var mikill verðmunur á Einvíginu eftir Arnald Indriðason sem var ódýrust á 3.794 kr. hjá Bónus en dýrust á 5.990 kr. hjá A4 sem var 58% verðmunur. Bókin Brakið eftir Yrsu Sigurðardóttur var ódýrust á 3.829 kr. hjá Bóksölu stúdenta og dýrust á 5.890 kr. hjá Office 1 sem var 54% verðmunur. Einnig má nefna stelpubókina Stelpur eftir Kristínu Tómasardóttur sem var ódýrust á 3.395 kr. hjá Bónus en dýrust á 4.990 kr. hjá A4, Hagkaupum og Máli og menningu sem er 47% verðmunur.

Mikill munur á vöruúrvali

Af þeim bókatitlum sem könnunin náði til voru flestir þeirra fáanlegir hjá Máli og menningu Laugavegi eða 58 titlar af 63. Hjá Iðu Lækjargötu voru 56 titlar fáanlegir og hjá Bóksölu stúdenta voru 55 titlar fáanlegir. Fæstir titlar í könnuninni voru fáanlegir í Bónus eða aðeins 29 af 63 og hjá Forlaginu Fiskislóð 31 af 63.

Sjá töflu á heimasíðu ASÍ

Penninn – Eymundsson neitaði þátttöku í könnuninni.

Könnunin var gerð í eftirtöldum verslunum á sama tíma: Máli og menningu Laugavegi, Forlaginu Fiskislóð, Bóksölu stúdenta, Griffli Skeifunni, Office 1 Skeifunni, Nettó Borgarnesi, Hagkaupum Akureyri, Bónus Egilsstöðum, Krónunni Selfossi, A4 Smáratorgi, Iðu Lækjargötu og Samkaupum Úrval Hafnarfirði. Penninn–Eymundsson neitaði þátttöku í könnuninni.

Hér er aðeins um beinan verðsamanburð að ræða, en ekki er lagt mat á gæði eða þjónustu söluaðila. Neytendur ættu einnig að hafa hugfast að verð á algengum bókatitlum breytast oft ört hjá verslunum á þessum árstíma.

Óheimilt er að vitna í könnunina í auglýsingum og við sölu nema með heimild ASÍ

Tekið af heimasíðu ASÍ

Blað Bárunnar, stéttarfélags og VMS er komið út

Þriðja tölublað Eljunnar er komið út. Fjölbreytt efni er í blaðinu að venju, meðal annars er viðtal við Mörtu Kuc trúnaðarmann á Kumbaravogi. Einnig er sagt frá byggingu hafnargarðsins á Eyrarbakka sem byggður var á sjöunda áratug síðustu aldar og vel heppnuðum þingmannafundi sem stéttarfélögin héldu í október.

Ætlar ríkisstjórnin að neyða ASÍ til að segja upp kjarasamningum?

Skömmu fyrir helgi óskaði forysta ASÍ eftir fundi með formönnum stjórnarflokkanna, formönnum þingflokka stjórnarflokkanna og formönnum og varaformönnum Fjárlaganefndar og Efnahags og viðskiptanefndar. Fundað var á  föstudag. Á þessum fundum var ábyrgðarmönnum stjórnarflokkanna gerð grein fyrir þeirra stöðu sem upp gæti komið við endurskoðun kjarasamninga í janúar nk. verði áform ríkisstjórnarinnar um takmarkaða hækkun bóta almannatrygginga og sérstakar álögur á lífeyrissjóðina samþykktar á Alþingi.

Eitt af meginmarkmiðum þeirra kjarasamninga sem gerðir voru milli ASÍ og SA í maí sl. var jöfnun lífeyrisréttinda. Samninganefnd ASÍ taldi sig ná samningi um þrjú mikilvæg og markviss skref í átt til meiri jafnræðis í lífeyrismálum en verið hefur.

Í fyrsta lagi hækkun á mótframlögum atvinnurekenda í áföngum upp að núverandi framlagi ríkisins vegna ríkisstarfsmanna. Í öðru lagi að staðinn verði vörður um lífeyrisréttindi á almennum vinnumarkaði með því að bætur almannatrygginga (og atvinnuleysisbóta) hækki með hliðstæðum hætti og hækkun lægstu launa. Í þriðja lagi að fundin verði leið til þess að jafna áunninn lífeyrisréttindi á almennum vinnumarkaði upp á við vegna afleiðinga fjármálahrunsins.

Áform ríkisstjórnarinnar um að skerða hækkun bóta almannatrygginga (og atvinnuleysistrygginga) og álögur á lífeyrissjóðina til að fjármagna umboðsmann skuldara, sérstakar vaxtabætur og almenna skattlagningu á launakostnað lífeyrissjóðanna eru klárt brot á þeim fyrirheitum sem ríkisstjórnin gaf við gerð kjarasamninga og þeim forsendum sem þeir byggja á. Verði þau að veruleika munu lífeyrissjóðir almenns launafólks þurfa að skerða lífeyrisréttindi sinna sjóðsfélaga og auka þar með enn frekar á þann mun sem á lífeyrisréttindum milli almenna og opinbera vinnumarkaðarins.

En hvers vegna telur ríkisstjórnin að almennt launafólk, einkum það sem verið hefur í aðildarfélögum Alþýðusambandsins og komið er á eftirlaun eða hefur misst starfsgetuna, eigi að greiða þennan reikning? Við því hafa ekki fengist nein svör. Á hinn bóginn setur þessi atlaga Alþýðusambandið óneitanlega í þá stöðu að setja upp sterkar varnir gegn þessum áformum.

Tekið af heimasíðu ASÍ

Desemberuppbót 2011

ATH

Á árinu 2011 greiðist sérstak álag á desemberuppbót kr. 15.000-.

Almenni samningur milli SGS og SA:
Uppbótin greiðist eigi síðar en 15. desember ár hvert, miðað við starfshlutfall og starfstíma, öllum starfsmönnum sem verið hafa samfellt í starfi hjá atvinnurekanda í 12 vikur á síðustu12 mánuðum eða eru í starfi fyrstu viku í desember.

Kjarasamningur fjármálaráðherra f.h. ríkissjóðs og SA:
Starfsmaður sem er við störf í fyrstu viku nóvembermánaðar skal fá greidda desemberuppbót 1. desember ár hvert miðað við fullt starf tímabilið 1. janúar til 31. október. Desemberuppbót er föst krónutala og tekur ekki hækkunumskv. öðrum ákvæðum kjarasamningsins. Á desemberuppbót reiknast ekki orlofsfé. Hafi starfsmaðurinn gegnt hlutastarfi eða unnið hluta úr ári, skal hann fá greitt miðað við starfshlutfall á framangreindu tímabili. Á sama hátt skal einnig starfsmaður sem látið hefur af starfi en starfað hefur samfellt í a.m.k. 3 mánuði (13 vikur) á árinu, fá greidda desemberuppbót, miðað við starfstíma og starfshlutfall. Sama gildir þótt starfsmaður sé frástörfum vegna veikinda eftir að greiðsluskyldu stofnunar lýkur eða í allt að 6 mánuði vegna fæðingarorlofs.

Kjarasamningur Sambands íslenskra sveitarfélaga og SA:
Starfsmaður í fullu starfi fær greidda desemberuppbót (persónuuppbót) 1. desember ár hvert. Með fullu starfi er átt við 100% starf tímabilið 1. janúar til 30. nóvember sama ár. Hafi starfsmaður gegnt hlutastarfi eða starfað hluta úr ári, skal hann fá greitt miðað við starfshlutfall og/eða starfstíma, þó þannig að hann hafi starfað samfellt a.m.k. frá 1. september það ár.
Starfsmaður sem lætur af störfum á árinu, en hafði þá starfað samfellt í a.m.k. 6 mánuði skal einnig fá greidda desemberuppbót miðað við starfstíma og starfshlutfall á árinu. Hlutfall skv. þessari málsgrein er reiknað sem hlutfall af fullri vinnu (100%) í 12 mánuði á almanaksárinu af síðast gildandi desemberuppbót.

Eru háir vextir og verðtrygging náttúrulögmál á Íslandi

Rétt er að vekja athygli á þessum fundi sem Alþýðusanband Íslands boðar til. Þessi fundur er öllum opinn og hvetjum við félagsmenn til að mæta.

Þetta verður fyrsti fundurinn af 3-4 um verðtrygginguna, vexti og krónuna. Sá næsti er 8. desember og svo höldum við áfram í janúar. Á þessum fyrstu tveimur fundum verður farið yfir málin í sögulegu samhengi og bornir saman ólíkir kostir í lána- og gjaldeyrismálum.

Opinn fundur ASÍ

Alþýðusamband Íslands boðar til opinna funda um vexti og verðtryggingu á Grand Hótel Reykjavík. Fyrsti fundurinn er fimmtudaginn 1. desember kl. 17 og ber hann yfirskriftina; Eru háir vextir og verðtrygging náttúrulögmál á Íslandi?

Þetta er fyrri fundurinn af tveimur hjá ASÍ nú í desember en svo er meinging að halda áfram í desember. Sá næsti er 8. desember og hann ber yfirskriftina; Hvað kostar krónan heimilin í landinu?

Á þessum tveimur fundum verður farið yfir málin í sögulegu samhengi og bornir saman ólíkir kostir í lána- og gjaldeyrismálum.

Hér má sjá nánari dagskrá þessara funda Alþýðusambandsins

Námskeið í gerð aðventukransa

Í byrjun jólaundirbúnings buðu Verslunarmannafélag Suðurlands, Báran stéttarfélag og Félag iðn- og tæknigreina félagsmönnum á jólaföndurnámskeið. Leiðbeinandi á námskeiðinu var Erla Björg Arnardóttir frá Grænna landi á Flúðum. Á námskeiðinu lærðu þátttakendur að útbúa eigin jólaskreytingar og þar urðu meðal annars til margir glæsilegir aðventukransar. Þátttakendur voru sammála um að námskeiðið hafi verið skemmtilegt og lærdómsríkt.

Frá samstöðuhópi um Heilbrigðisstofnun Suðurland

Samstöðuhópur um HSu var á fundi með velferðarráðherra Guðbjarti Hannessyni ásamt starfsfólki og stjórnendum Heilbrigðisstofnunar Suðurlands þriðjudaginn 15. nóvember sl. Á fundinum fór ráðherra yfir helstu kennitölur heilbrigðismála síðastliðin ár jafnframt því að útskýra hverjar breytingar hefðu orðið á málaflokknum frá efnahagshruninu.
Fjölmargar fyrirspurnir komu fram á fundinum og ljóst að Sunnlendingar hafa miklar áhyggjur af framtíðarhorfum Heilbrigðisstofnunarinnar. Margir fundarmanna lýstu áhyggjum sínum af boðuðum niðurskurði og töldu að nú þegar væri of langt gengið. Fram kom í máli heilbrigðisráðherra að stefnt væri að því að halda skurðstofu HSu áfram opinni á dagvinnutíma og fagnar samstöðuhópurinn því. Hópurinn telur einsýnt að tekið verði tillit til þess þegar fyrirhugaðar breytingar á húsnæði stofnunarinnar verða skipulagðar jafnframt því að tækjabúnaður verði uppfærður.

Ráðherra sagði einnig að rétt væri að framlag til sjúkratrygginga hefði hækkað þrátt fyrir niðurskurð á öllum öðrum sviðum og vekur það spurningar um hvort verið sé að flytja kostnað til sérfræðinga í Reykjavík. Ekki fengust um það skýr svör frá ráðherra.

Hann taldi að með þeim niðurskurði sem nú er boðaður væri botninum náð og ekki yrði um frekari niðurskurð að ræða á fjárlögum 2013.

Samstöðuhópur um Heilbrigðisstofnun Suðurlands lýsir miklum áhyggjum af boðuðum niðurskurði ofan á þann sem nú þegar hefur skert þjónustu við Sunnlendinga verulega. Samstöðuhópurinn telur að að sá sparnaður sem velferðaráðuneytið telur sig ná fram með boðuðum niðurskurði komi að miklu leiti fram í auknum kostnaði þeirra sem þjónustuna þurfi að nota.

Jólaföndurnámskeið

Stéttarfélögin á Austurvegi 56, Selfossi bjóða félagsmönnum sínum á jólaföndurnámskeið í borðakransagerð, hurðakransagerð (aðventukrans) og grenilengjugerð Leiðbeinandi er Erla Björg Arnardóttir frá Grænna landi á Flúðum.

Borðakransa- og hurðakransagerð efnisgjald kr. 3.000,-
21. nóv. kl. 20:00

22. nóv. kl. 18:00

Grenilengjugerð efnisgjald kr. 3.500,-

23. nóv. kl. 20:00

24. nóv. kl. 18:00

Skráning fer fram á Þjónustuskrifstofu stéttarfélaganna á Suðurlandi í síma 480 5000.

Einnig er hægt að skrá sig á hugrun@vms.is og thorunnth@midja.is

Síðasti skráningardagur er 17. nóvember nk

Nýr dómur – Greitt skal fyrir auknar starfsskyldur

Hæstiréttur komst að þeirri niðurstöðu í dómi frá 3.11 sl. að atvinnurekanda, sem hyggst auka við starfsskyldur starfsmanns, beri annað af tvennu að gera það með því að eiga frumkvæði að breytingum á ráðningarsamningi eða tilkynna það skriflega eins og kjarasamningar áskilja. Þar sem hann gerði hvorugt öðlaðist starfsmaðurinn rétt til aukagreiðslna vegna hinna nýju starfsskyldna. Í málinu var einnig deilt um það hvort starfsmaðurinn ætti rétt á greiðslu bifreiðastyrks á uppsagnarfresti þar sem ekki var krafist vinnuframlags hans og komst Hæstiréttur að þeirri niðurstöðu að svo væri.

Hæstiréttur komst að þeirri niðurstöðu í dómifrá 3.11 sl. að atvinnurekanda, sem hyggst auka við starfsskyldur starfsmanns, beri annað af tvennu að gera það með því að eiga frumkvæði að breytingum á ráðningarsamningi eða tilkynna það skriflega eins og kjarasamningar áskilja. Þar sem hann gerði hvorugt öðlaðist starfsmaðurinn rétt til aukagreiðslna vegna hinna nýju starfsskyldna. Í málinu var einnig deilt um það hvort starfsmaðurinn ætti rétt á greiðslu bifreiðastyrks á uppsagnarfresti þar sem ekki var krafist vinnuframlags hans og komst Hæstiréttur að þeirri niðurstöðu að svo væri.

Dómurinn er reifaður þannig á vef Hæstaréttar:

„I krafði H ehf. um bakvaktaálag vegna símavaktar, sem henni var gert að sinna í tengslum við vinnu sína fyrir H ehf., auk þess sem hún gerði kröfu um greiðslu bifreiðastyrks á meðan á uppsagnarfresti stóð. Símavaktinni var komið á nokkru eftir að I hóf störf og deildu aðilar um það hvort símavaktin væri hluti af starfsskyldum hennar samkvæmt ráðningarsamningi og starfslýsingu eða hvort um bakvaktir í skilningi kjarasamninga hefði verið að ræða. Var það niðurstaða Hæstaréttar að H ehf. hefði ekki fært sönnur á þá staðhæfingu sína að vinnuskyldan hefði rúmast innan starfsskyldna I samkvæmt ráðningarsamningi. Við breytingu á starfstilhögun I hefði félagið hvorki haft frumkvæði að því að breyta ráðningarsamningi hennar í þá veru að þar kæmi fram að hin breytta tilhögun félli undir starfsskyldur hennar, án þess að greiðsla kæmi fyrir, né greint henni frá því með skriflegum hætti, svo sem áskilið var í kjarasamningi. Var krafa I um greiðslu bakvaktaálags því tekin til greina, en hún lækkuð verulega. Þá féllst Hæstiréttur á það með héraðsdómi að H ehf. skyldi greiða I umsamin bifreiðahlunnindi á uppsagnarfresti.“

Megin niðurstaða Hæstaréttar felur það í sér, að atvinnurekendur bera hallan af því ef ekki liggur fyrir skrifleg og skýr sönnum um það, hvort tilteknar starfsskyldur sem ella væru greiðsluskyldar, líkt og bakvaktarálög sem skilgreind eru sérstaklega í kjarasamningum, séu hluti af þeim starfsskyldum sem tillit hefur tekið til við  heildarákvörðun launa.

Rökstuðning sinn sækir Hæstiréttur m.a. til tilskipunar Evrópusambandsins nr. 91/533/EBE um skriflega staðfestingu ráðningar. Í dóminum segir:

„Í 68. gr. samningsins um Evrópska efnahagssvæðið, sbr. 1. mgr. 2. gr. laga nr. 2/1993, segir að á sviði vinnulöggjafar skuli samningsaðilar gera nauðsynlegar ráðstafanir, sem tilgreindar séu í XVIII. viðauka við samninginn, til að tryggja góða framkvæmd hans. Í samræmi við þetta samningsákvæði hefur tilskipun Evrópusambandsins nr. 91/533/EBE um skyldu vinnuveitanda að skýra launþegum frá samningsskilmálum eða ráðningarfyrirkomulagi tekið gildi hér á landi, sbr. auglýsingu félagsmálaráðuneytisins nr. 503/1997. Í auglýsingunni er tekið fram að ákvæðum tilskipunarinnar hafi verið hrint í framkvæmd með kjarasamningum aðildarsamtaka vinnumarkaðarins og teljist ákvæðin lágmarkskjör á íslenskum vinnumarkaði samkvæmt 1. gr. laga nr. 55/1980 um starfskjör launafólks og skyldutryggingu lífeyrisréttinda, sbr. 5. gr. laga nr. 69/1993.“

Samhljóða ákvæði byggð á fyrrgreindri tilskipun um skriflega ráðningarsamninga og skriflega staðfestingu ráðningar eru síðan í öllum kjarasamningum aðildarsamtaka ASÍ. Þar er skýrt tekið fram að allar breytingar á ráðningarkjörum, umfram það sem leiðir af lögum eða kjarasamningum, skuli staðfesta með breytingum á ráðningarsamningi eða skriflegri staðfestingu. Hafi atvinnurekendur ekki frumkvæði að því bera þeir hallan af sönnum um að tillit hafi verið tekið til hinna breyttu starfsskyldna við heildarákvörðun launa.

Tekið af heimasíðu ASÍ

Bónus, fyrirtæki ársins á Suðurlandi

Bónus var í dag valið fyrirtæki ársins 2011 á Suðurlandi af félagsmönnum Verslunarmannafélags Suðurlands og Bárunnar, stéttarfélags. Niðurstaðan var kynnt í nýrri verslun fyrirtækisins við Larsenstræti á Selfossi. Þór Hreinsson skrifstofustjóri Þjónustuskrifstofu stéttarfélaganna á Suðurlandi afhenti verslunarstjóra fyrirtækisins viðurkenningarskjal og einnig fengu starfsmenn Bónus blómakörfu við það tækifæri. Fram kom í máli hans að mannauður er dýrmætasti hluti hvers fyrirtækis og að Bónus væri vel að verðlaununum komið. Markmið könnunarinnar er að gefa starfsmönnum tækifæri að koma skoðunum sínum á framfæri og skapa þannig grundvöll til að ræða vinnuaðstæður og kjör.

Sendur var spurningalisti til allra félagsmanna Verslunarmannafélags Suðurlands og Bárunnar, stéttarfélags. Þátttakendur voru beðnir að leggja mat á lykilþætti í sínu starfsumhverfi. Könnuninni er meðal annars ætlað að mæla hversu vel svarendum líður í vinnunni, stjórnun, starfsanda og vinnuaðstöðu. Fyrirhugað er að gera þessa könnun árlega framvegis. Alls svöruðu starfsmenn 33 fyrirtækja á félagssvæði félaganna könnuninni. Eftirtalin fyrirtæki skoruðu hæst hjá starfsfólkinu:

1. Bónus, Selfossi

2. Olís, Selfossi

3. Tölvu- og rafeindaþjónusta Suðurlands

4. N1, Suðurlandi

5. Hótel Selfoss

6. Pylsuvagninn Selfossi

7. Jötunn vélar

8. Dvalar- og hjúkrunarheimiliðKumbaravogur

9. Heilbrigðisstofnun Suðurlands

10. Húsasmiðjan