Formaður FIT harðorður á 1. maí hátíðarhöldunum á Selfossi
„Nemendur eru fengnir erlendis frá til að vinna launalausa sjalboðavinnu og ekki er hirt um að virða samninga og lögbundin réttindi. Fólk frá fjarlægjum löndum er geymt í kjallaraholum milli þess sem því er pískað út við vinnu á saumastofum. Það keppir enginn við svoleiðis rekstur ef rekstur skyldi kalla. Kannski er nær að tala um það sem plantekrur en hvað sem það heitir, þá á það ekki heima í okkar samfélagi eða atvinnulífi, hvorki hér á Suðurlandi né í öðrum landshlutum“, sagði Hilmar Harðarson, formaður FIT, stéttar og fagfélags í hátíðarræðu sinni á 1. maí hátíðarhöldunum á Selfossi í dag.
Á fimmta hundruð manns tóku þátt í kröfugöngu dagsins á staðnum en gegnið var frá húsnæði stéttarfélaganna að Hótel Selfossi þar sem boðið var upp á fjölbreytta dagskrá og kaffiveitingar í boði stéttarfélaganna. Eva Dögg Einarsdóttir landvörður í Þjóðgarðinum á Þingvöllum og trúnaðarmaður Bárunnar flutti einnig ræðu í tilefni dagsins. Fundarstjóri var Halldóra Sigríður Sveinsdóttir formaður Bárunnar.
Aflandsfélög á íslenskum vinnumarkaði
„Það er dapurlegt staðreynd að mörg hálfgerð aflandsfélög á íslenskum vinnumarkaði eru nú að vinna sum af stærstu verkefnum á okkar byggingamarkaði. Við höfum svo síðustu daga fengið nánari vísbendingar um að þetta aflandseyjasiðferði kennitöluflakkara er því miður líka að finna hjá nokkrum aðilum sem komist hafa til áhrifa í íslenskum stjórnmálum“, sagði Hilmar ennfremur í ræðu sinni.
