Skrifstofa Bárunnar stéttarfélags verður lokuð fimmtudaginn 15. janúar frá klukkan 11.00 og allan föstudaginn 16. janúar vegna námskeiðs starfsfólks.
The Báran union office will be closed on Thursday, January 15th from 11:00 and all day Friday, January 16th due to a staff course.
Kæri félagsmaður, starfaðir þú hjá sveitarfélagi á síðasta ári?
Vissir þú að í gildandi kjarasamningi SGS við sveitarfélögin er fjallað um Félagsmannasjóð, nánar tiltekið í kafla 13.8. Þar segir:
13.8. Félagsmannasjóður
Launagreiðandi greiðir mánaðarlega framlag í félagsmannasjóð sem nemur 2,2% af heildarlaunum félagsmanna. Úthlutun úr sjóðnum skal fara fram 1. febrúar ár hvert samkvæmt stofnskrá sjóðsins.
Gjaldið var áður 1,5% en er 2,2% frá 1. apríl 2024.
Báran, stéttarfélag á aðild að sjóðnum og ber að standa skil á þessum greiðslum til félagsmanna sem starfa eftir þessum samningi 1. febrúar ár hvert fyrir árið á undan. Forsenda þess að hægt sé að greiða úr sjóðnum er að Báran, stéttarfélag hafi bankaupplýsingar félagsmanna sem eiga rétt á að fá greiðslu úr sjóðnum. Það er þau sem voru/eru starfandi hjá sveitarfélagi á síðasta ári.
Athugið að ekki er tekin staðgreiðsla af upphæðinni sem greidd er út til félagsmanna. Því þarf að greiða skatta af þessum greiðslum eftir á.
Kíktu inn á Félagsvef Bárunnar og kannaðu þínar upplýsingar!
Þar inni má einnig setja inn eða laga ef þarf umbeðnar upplýsingar fyrir Félagsmannasjóðinn eins og t.d. netfang, símanúmer og bankareikning.
Athugið að þeir sem eru á almennum vinnumarkaði eiga ekki rétt á greiðslum úr félagsmannasjóði.
Nú styttist í að hægt verði að sækja um orlofseignir fyrir páskana 2026.
Leigutímabilið er frá 1. til 8. apríl.
Umsóknarfrestur er frá 14. janúar 2026 kl. 10:00 og lýkur 28. janúar 2026 kl. 10:00. Sótt er um á Félagavef Bárunnar
Niðurstöður úthlutunar verða síðan kynntar föstudaginn 30. janúar 2026
Við minnum á að það er gríðarlega mikilvægt að fara vel yfir og skrá rétt netfang í umsókninni. Allar tilkynningar um úthlutun og önnur mikilvæg samskipti verða send á það netfang sem gefið er upp.
Þess má geta að íbúðirnar í Sóltúni 28, Reykjavík og Borgartúni 24a verða áfram í sveigjanlegri leigu, sem veitir meiri valmöguleika fyrir þá sem hyggja á páskafrí í höfuðborginni. Nánari upplýsingar um þær leigueiningar er hægt að finna hér.
Samkvæmt núgildandi kjarasamningi SGS og Samtaka Atvinnulífsins hækka laun þann 1. janúar 2026. Kauptaxtar hækka þá um 5,3% en 23.750 kr. að lágmarki. Þá hækka kjaratengdir liðir samningsins um 3,5% frá sömu dagsetningu.
Starfsgreinasambandið hefur gefið út nýja kauptaxta vegna starfa á almennum vinnumarkaði þar sem hægt er að sjá hvernig mismunandi launaliðir hækka út frá launaflokkum og starfsaldri.
Kauptaxtar SGS fyrir starfsfólk á almennum vinnumarkaði
Kauptaxtar SGS fyrir starfsfólk í veitinga-, gisti- og þjónustustarfsemi
Laun þeirra sem ekki eru á taxtalaunum hækka um 3,5% en þó að lágmarki um 23.750 kr. Það þýðir að almenn mánaðarlaun sem eru yfir 678.571 kr. hækka um 3,5%, en laun sem eru undir 678.571 kr., en þó yfir lágmarkstaxta kjarasamnings, hækka um 23.750 kr. á mánuði. Gæta þarf að því að eftir breytinguna séu laun að lágmarki jafngóð og skv. kauptaxta kjarasamnings. Með almennum mánaðarlaunum er átt við föst mánaðarlaun fyrir dagvinnu.
Báran, stéttarfélag vill hvetja félagsmenn að fylgjast vel með að umsamdar launahækkanir skili sér inn á launareikninga og birtist með réttum hætti á launaseðli janúarmánaðar. Jafnframt eru félagsmenn hvattir til að ganga úr skugga um að desemberuppbót hafi skilað sér með réttum hætti, en hana átti að greiða út í síðasta lagi 15. desember síðastliðinn. Ef einhverjar spurningar vakna eru félagsmenn hvattir til að hafa samband við starfsfólk Bárunnar.
Einnig er vert að benda á reiknivél þar sem sjá má yfirlit yfir launahækkanir á samningstímanum, bæði út frá kauptöxtum og almennum launum.
Fjármála- og efnahagsráðuneytið hefur gefið frá sér tilkynningu um skattbreytingar á árinu 2026. Þar kemur meðal annars fram hvert staðgreiðsluhlutfall næsta árs verður, sem og fjárhæð persónuafsláttar og hvar skattþrepamörkin munu liggja.
| Skattþrep 1: Af tekjum 0 – 498.122 kr. | 31,49% |
| Skattþrep 2: Af tekjum 498.123 – 1.398.450 kr. | 37,99% |
| Skattþrep 3: Af tekjum yfir 1.398.450 kr. | 46,29% |
| Skatthlutfall barna (fædd 2011 eða síðar) af tekjum umfram 300.000 kr. á ári | 6% |
| Persónuafsláttur á mánuði | 72.492 kr. |
| Persónuafsláttur á ári | 869.898 kr. |
Heimsendingaþjónusta hefur aukist jafnt og þétt hérlendis sem og erlendis. Segja má að frá tímum heimsfaraldurs hafa orðið veruleg umskipti í dreifingu vöru og matvæla og eru þær orðnar fastur hluti af daglegu lífi margra í sífellt hraðara samfélagi. Hér verður ekki lagt mat á hvort þessi þróun sé æskileg eða ekki. Athyglinni verður þess í stað beint að þeim sem sinna heimsendingum.
Víða í Evrópu og einnig hér á landi hafa sprottið upp stafrænir vettvangar (e. digital platforms) sem starfa sem eins konar „markaðstorg“ fyrir heimsendingar. Þar má nefna fyrirtæki á borð við Wolt, DoorDash, Aha og Uber Eats. Þessir vettvangar hafa notið mikilla vinsælda meðal neytenda og sendlar á þeirra vegum orðnir algeng sjón í borgarumhverfinu, á reiðhjólum, rafhjólum, rafhlaupahjólum og í bifreiðum.
Starfsemin byggist á því að stafræni vettvangurinn gerir samninga við veitingastaði, verslanir og aðra þjónustuaðila, útvegar sendla og stýrir verkefnum í gegnum snjallforrit þannig að pöntunin berist frá seljanda til kaupanda. Að minnsta kosti í orði kveðnu virðist þetta vera kerfi þar sem allir fá sitt. En er það svo?
Réttleysi og einhliða samningsskilmálar
Verkalýðshreyfingin hefur áður lýst alvarlegum áhyggjum af launum og starfskjörum þeirra sem starfa hjá stafrænum vettvöngum, sér í lagi við sendlastörf. Sama staða blasir við víða erlendis og fjöldi dómsmála hefur fjallað um réttarstöðu þeirra sem sinna þessum störfum. Það þarf heldur ekki að leita langt eftir frásögnum sjálfra sendlanna af óöryggi, lágum tekjum og skorti á vernd.
Ástæðan er einföld: fólk sem sinnir þessum störfum nýtur oft engrar verndar sem launafólk. Um er að ræða einhliða ákvörðun um skipulag starfsins í formi verktöku og allar helstu ákvarðanir og reglur eru settar af vettvanginum sjálfum. „Verktakinn“ hefur þannig enga aðkomu að samningsskilmálum, ákvarðar ekki endurgjald sitt, né hefur tök á að leggja á það virðisaukaskatt, þrátt fyrir skyldu um greiðslu slíks skatts.
Áður hafa komið fram upplýsingar um að tiltekinn hópur sendla hér á landi fái um 4.800 krónur á klukkustund fyrir störf sín, óháð hvenær tíma dags eða vikunnar er unnið. Undirrituð hefur áður birt grein þar sem slík þóknun er reiknuð m.t.t. kostnaðar sem verktakar bera lögum samkvæmt og í samræmi við störf sín, auk kostnaðar við vinnubúnað og notkun bifreiðar. Raunverulegar tekjur lækka niður í um 1.450 krónur á klukkustund áður en tekjuskattur er dreginn frá. Það jafngildir um 55% af lægstu dagvinnulaunum samkvæmt kjarasamningum og aðeins um 31% af yfirvinnulaunum.
Tækni réttlætir ekki afturför
Stuðningur við nýja tækni og aukna heimsendingaþjónustu þarf ekki að stangast á við það að tryggja mannsæmandi kjör. Það er fyllilega hægt að bjóða upp á þessa þjónustu samhliða sanngjörnum launum, tryggingum og réttindum. Í raun er ekkert nýtt undir sólinni, sendlastörf hafa lengi verið til og munu áfram vera það. Fólk sem sinnir þeim á rétt á sömu vernd og stöðu og annað vinnandi fólk. Spurningin er því ekki endilega hvort það borgi sig að fá heimsendingu, heldur hver borgar fyrir hana. Er það neytandinn eða er það sendillinn sjálfur, sem stendur uppi með kjör langt undir lágmarksákvæðum kjarasamninga?
Karen Ósk Nielsen Björnsdóttir, lögfræðingur ASÍ.
Opnunartími skrifstofu Bárunnar, stéttarfélags um áramót verður sem hér segir:
Milli jóla og áramóta verður skrifstofa opin 29. og 30. desember.
Lokað verður á gamlársdag og 2. janúar.
Verðlagseftirlit ASÍ kannaði verð á jólabókum þann 18. desember í 6 verslunum, Bónus, Nettó, Hagkaup, Forlaginu, Bóksölu Stúdenta og Eymundsson en alls var verð kannað á 496 bókatitlum. Vöruúrval er mismunandi milli verslana, en fæstir bókatitlar fundust í Bónus, alls 170, og flestir í Eymundsson, alls 479.
Af þeim bókatitlum sem voru til í öllum verslunum var lægsta verðið oftast að finna í Bónus á meðan hæsta verðið var oftast að finna í Forlaginu. Ef lágvöruverslanirnar Bónus og Nettó eru undanskildar, var lægsta verðið oftast að finna í Bóksölu Stúdenta.
Segja má að verðstríð sé í gangi á milli Nettó og Bónus, þar sem litlu munar á verði sem hefur farið lækkandi frá því verðlagseftirlit skoðaði verð fyrr í mánuðinum. Afslættir í Eymundsson hafa verið tíðir í aðdraganda jóla og því lítið mark takandi á upphaflegu listaverði.
Algengt er að verðmunur hlaupi á bilinu 500-1500 krónum á bækurnar og því getur verið gott fyrir neytendur að gera verðsamanburð. Samanburðinn má sjá í heild sinni hér. Vert er að benda neytendum á að hægt er að bera saman nýjustu verð á Verdlagseftirlit.is eða með samanburði í Nappinu.
Sjá frétt og nánari upplýsingar um samanburð á bókum á heimasíðu ASÍ ( www.asi.is )
Verðlagseftirlit ASÍ kannaði verð á algengum jólavörum í 8 verslunum í síðustu viku. Verðmunur milli vara og verslana getur verið mjög breytilegur. Þó verðmunur kunni að vera lítill í krónum á smáum einingum, getur oft verið um töluverðan hlutfallslegan mun að ræða og oft um miklar fjárhæðir að ræða þegar gerð eru stór innkaup fyrir jólin. Verð voru könnuð í Prís, Bónus, Krónunni, Nettó, Hagkaup, Fjarðarkaup, Kjörbúðinni og Extra.
Samkvæmt mælingum verðlagseftirlitsins í desember mælist verðlag lægst í Prís. Er þá miðað við meðalverðmun á vörum sem fáanlegar eru í fleiri en einni verslun. Verðlag í Bónus og Krónunni liggur litlu ofar, en að jafnaði er verð í þeim verslunum um 2-3% hærra en þar sem varan finnst á lægsta verðinu.
Vinsælar vörur eru ekki endilega fáanlegar í öllum verslunum og verðbreytingar geta verið tíðar á þessum árstíma. Til dæmis hófst sala á hátíðarís frá Emmessís í Krónunni á verðinu 1.549 kr. í nóvemberbyrjun, en hefur síðan lækkað í 1.180 kr. eða um tæpan fjórðung. Einnig er algengt að munur sé á stærðum pakkninga bæði innan og milli verslana og því getur verið gagnlegt að gera samanburð á kíló- og lítraverði ætli neytendur sér að gera hagkvæm innkaup um jólin. Neytendum er því bent á að hægt er að nota Nappið til samanburðar eða vöruleit á Verdlagseftirlit.is þar sem öll gögn og nýjustu verð eru aðgengileg.
Samanburður getur borgað sig
Afar mikill munur getur verið á verði eftir því hvaða verslun og hvaða pakkning er valin. Hálfs lítra Pepsi í plasti kostaði til dæmis meira í Hagkaup (279 kr.) heldur en tveggja lítra Pepsi í Prís (259 kr.). Jafnvel sami 1 kg. kassinn af Nóa konfekti í lausu kostaði 1.100 kr. minna í Prís (5.399 kr.)en í Hagkaup (6.499 kr.).
Mandarínur í lausu fengust á 485 kr. kílóið í Prís, en kílóverð á klementínum var frá 611 kr. í Krónunni upp í 699 kr. í Hagkaup.
Lægsta kílóverð á laufabrauði var 2.653 kr. á ósteiktu laufabrauði frá Ömmubakstri í Prís. Ósteikt laufabrauð frá Ömmubakstri var ódýrara en ósteikt laufabrauð frá Kristjáns bakaríi í öllum fjórum verslunum þar sem bæði fengust þ.e. í Prís, Bónus, Krónunni og Hagkaup.
Steikt laufabrauð frá Ömmubakstri var einnig ódýrara en steikt laufabrauð frá Kristjáns bakaríi í öllum verslunum þar sem bæði fengust þ.e. í Bónus, Krónunni, Nettó, Hagkaup og Fjarðarkaup. Var munurinn á Ömmubaksturs og Kristjáns steiktu laufabrauði allt frá 7% í Hagkaup upp í 18% í Fjarðarkaup þegar kílóverð eru borin saman.
Vegan laufabrauð frá Ömmubakstri var ódýrast í Bónus, en kílóverðið á því þar (7.539 kr.) var 70% hærra en á ódýrasta steikta laufabrauðinu, sem var Ódýrt laufabrauð í Krónunni (4.410 kr./kg).
Fjarðarkaup buðu upp á lægsta kílóverð á Lindu konfekti, en 900 gr. kassi kostaði 3.998 kr. þar. Kassinn kostaði 4.289 kr. í Bónus en 4.999 kr. í Hagkaup. Kílóverðið á Lindu konfekti var nokkru lægra en á Nóa konfekti, sem var lægst 5.399 kr./kg í Prís fyrir 1kg af Nóa konfekti í lausu.
Kílóverð á 900gr kassa frá Lindu var lægra en kílóverð 1 kg. Nóa konfektkassans í Prís í öllum verslunum nema Hagkaup, þar sem það var 5.554kr.
Hæsta kílóverð á Nóa konfekti í Bónus var á 135 gr. kassa, 14.995 kr./kg. Hæsta kílóverð í Bónus á Lindu konfekti var aftur á móti á 220 gr. kassa, 8.172 kr./kg. Verðbil á konfekti getur því verið sérlega breitt eftir því hvaða kassi er keyptur og í hvaða verslun.
Nýjasta samanburð á kílóverði konfekts og á öðrum vörum má finna á heimasíðu verðlagseftirlitsins. Þar má líka sjá að 900 gr. af Quality Street molum kostaði frá 1.799 kr. í Prís upp í 2.299 kr. í Nettó.
Í bakstur og matreiðsluna
Ódýrasta smjörið fæst í Prís, 798 kr. fyrir 500 gr. af smjöri sem jafnframt var lægsta fáanlega kílóverð á smjöri. Verð á smjöri í Kjörbúðinni og Extra var einungis krónu dýrara. Í Bónus og Fjarðarkaupum kostaði sama eining 819 kr. og verðið í Krónunni var krónu dýrara, 820 kr. Smjörið var nokkuð dýrara í Hagkaupum, á 909 kr.
Rjóminn er einnig ódýrastur í Prís þar sem 500 ml. af 36% rjóma fæst á 749 kr. Verðið í Bónus (768 kr.) og Krónunni (769 kr.) liggur litlu ofar. Neytendum er þó bent á að hægt er að finna lægra lítraverð á rjóma í eins lítra fernu og getur munað um 100 krónum á lítrann á ódýrasta verði. Eins líters rjómi kostar 1.389 krónur í Prís borið saman við 1.395 krónur í Bónus og 1.396 kr. í Krónunni.
Suðusúkkulaði í baksturinn var einnig á lægsta verðinu í Prís ef borið er saman verð á Konsúm suðusúkkulaði frá Nóa-Síríus (300 gr.) og Lindu suðusúkkulaði (200 gr.). Lægsta kílóverðið á suðusúkkulaði er hins vegar að finna í Bónus, á Bónus suðusúkkulaði (2.330 kr.) sem er 5 krónum ódýrara en Lindu suðusúkkulaðið í Prís (2.335 kr.)
Jólasíldin ódýrust á tilboði í Nettó
Jólasíldin frá ORA var ódýrust í Nettó (899 kr.) þegar Verðlagseftirlitið fór á vettvang. Vert er að taka fram að síldin var auglýst á tilboði í Nettó þegar verðtaka fór fram en almennt listaverð er 1.099 kr. Alls munaði fjögur hundruð krónum á lægsta og hæsta verði en jólasíldin var dýrust í Kjörbúðinni og Extra, á 1.299 kr. Einungis munaði krónu á á verðum í Bónus (998 kr.) og Krónunni (999 kr.).
ORA hátíðarsíld var einnig ódýrust í Nettó (742 kr.) þar sem hún var á tilboði en þar á eftir röðuðu sér Krónan (820 kr.), Hagkaup (949 kr.), og Fjarðarkaup (1.058 kr.). Dýrust var hátíðarsíldin í Kjörbúðinni á 1.099 kr. Marineruð síld frá ORA var ódýrust í Krónunni (598 kr.) en fyrir þá sem vilja erlenda síld mátti einnig finna síld frá Klädesholmen í nokkrum verslunum. Lauksíldin frá Klädesholmen var ódýrust í Fjarðarkaupum og kostaði 412 kr.
Verðsamanburður getur verið vandmeðfarinn. Marineruð ORA síld í 590gr krukku kostaði 829 kr. í Bónus en Gestus marineruð síld í 600 gr. krukku kostaði 699 kr. í Krónunni. Munurinn er 19%, en munurinn á kílóverði varanna tveggja er 21%. Hins vegar er þurrvigt síldarinnar 300 gr. hjá ORA, en 250 gr. hjá Gestus. Ef bara sú vigt er skoðuð er kílóverð síldarinnar lægra á ORA síldinni í Bónus, 2.763 kr./kg á móti 2.796 kr./kg á Gestus-síldinni í Krónunni.
Meðlætið
Nokkuð lítill verðmunur var á grænum og gulum baunum frá ORA, 420 gr., þegar horft er á krónutölumun milli verslana. Hlutfallslegur munur gat þó numið allt að fjórðungi milli lægsta og hæsta verðs. Lægsta verðið á grænum baunum var í Prís (238 kr.) en þar á eftir fylgdu Bónus (247 kr.), Krónan (248 kr.), Nettó (249 kr.) og Fjarðarkaup (259 kr.). Á gulum baunum var lægsta verðið hins vegar í Kjörbúðinni (290 kr.) og Extra (290 kr.) en þar á eftir fylgdu Bónus (297 kr.) og Krónan (298 kr.).
Hið sígilda rauðkál frá Beauvais var ódýrast á 379 kr. í Bónus en hæsta verðið var að finna í Extra þar sem það kostaði yfir 40% meira (529 kr.). Rauðkálið fannst einnig í Krónunni (380 kr.), Fjarðarkaupum (389 kr.), Nettó (419 kr.) og Hagkaupum (449 kr.)
Gosið
Mikið úrval er að finna af drykkjarvörum á veisluborðið þar sem mikill munur getur verið á stærðum pakkninga. Á vef verðlagseftirlitsins má finna nýjustu verð yfir einstakar vörur en einnig yfir ódýrasta lítraverð.
Verð á malti og appelsín í 500 ml. dós var lægst í Prís af þeim verslunum sem verðlagseftirlitið heimsótti. Það er jafnframt ódýrasta fáanlega lítraverð á þessum sígilda jóladrykk. Dósin var á 269 kr. Prís, borið saman við 277 kr. í Bónus, 278 kr. Krónunni og 279 kr. í Fjarðarkaupum. Allt að þriðjungsmunur var á lægsta og hæsta verði á malti og appelsíni í dós en hæsta verðið var að finna í Kjörbúðinni og Extra.
Ódýrasta flaska af kóki í gleri, 330 ml. var í Bónus á 225 krónur en hæsta verðið var 279 krónur í Hagkaup og Kjörbúðinni. Sé ætlunin að finna lægsta lítraverðið er það að finna í kaupum á 4 x 2 ltr kókflöskum í Prís (144 kr./ltr).
Verðbreytingar milli ára
Jólavörur hafa sumar hverjar hækkað verulega frá desember í fyrra.
Aðrar vörur lækka þó.
Fyrirvari
Könnunin var gerð í síðustu viku og voru verð á matvöru borin saman í Bónus, Krónunni, Prís, Nettó, Fjarðarkaupum, Hagkaupum, Kjörbúðinni og Extra. Í verðsamanburði er miðað við hilluverð sem neytandi hefur upplýsingar um í versluninni. Þegar skýrt er gefið til kynna að veittur sé afsláttur/tilboðsverð af merktu verði við kassa var skráð afsláttarverð. Tilboð eru víða í matvöruverslunum nú fyrir hátíðarnar og verðbreytingar tíðar og geta neytendur nálgast nýjustu verð verðlagseftirlitsins í Nappinu eða á verdlagseftirlit.is
Hér er aðeins um beinan verðsamanburð að ræða, en ekki er lagt mat á gæði eða þjónustu söluaðila.
Á heimasíðu Así má sjá nánari upplýsingar:
Verðkönnun á algengum jólavörum – Vinnan – Tímarit Alþýðusambands Íslands
Kæru félagsmenn, við höfum sent frá okkur nýtt rafrænt fréttabréf í tölvupósti til allra sem eru með skráð netfang.
Meðal efnis er: