Bjarg byggir tvö fjölbýlishús á Selfossi
https://www.sunnlenska.is/frettir/bjarg-byggir-tvo-fjolbylishus-a-selfossi/
https://www.sunnlenska.is/frettir/bjarg-byggir-tvo-fjolbylishus-a-selfossi/
Vegna óviðráðanlegra aðstæðna er skiptiborð okkar lokað frá klukkan 14:00 til lok dags í dag 02/12/20.
Biðjumst velvirðingar á því og minnum á að það er hægt að senda póst á baran@baran.is .
Due to unforseen situation, our phone line will be offline from 14:00 until the end of the day 02/12/20.
We apolagize for any inconvenience and would like to remind you that you can send e-mail with your errand to baran@baran.is .
Fallin er nú frá góður félagi og vinur og okkur hjá Bárunni langar að minnast hans með fátæklegum kveðjuorðum.
Halldór var mikill óþreytandi baráttumaður fyrir réttindum launafólks þó hans bardagar færu flestir fram annarsstaðar en á síðum fjölmiðla. Hann var bæði réttsýnn og sanngjarn en fastur fyrir og rökfastur þegar við átti. Við hjá Bárunni áttum í töluverðum samskiptum við hann gegnum árin og hann starfaði mikið með formanni Bárunnar í mörgum þýðingarmiklum verkefnum innan verkalýðshreyfingarinnar.
Fyrir utan yfirburðaþekkingu sína og reynslu af verkalýðsmálum þá var Halldór gegnheill og góður drengur og auðvelt að láta sér líka við hann, jafnvel þó hann væri á öndverðum meiði við skoðanir þeirra sem ekki höfðu hans reynslu og kunnáttu til að bera og vildu viðra skoðanir sínar. Verkalýðshreyfingin og launafólk á Íslandi horfir á bak einum af sínum bestu drengjum og ötullum talsmanni fyrir bættum og sanngjörnum kjörum. Sérstaklega er vert að nefna framlag Halldórs til bætts eftirlits á vinnumarkaði og með hagsmunum erlends verkafólks en þar er víða pottur brotinn sem kunnugt er.
Við kveðjum Halldór með söknuði og sendum aðstandendum hans okkar dýpstu samúðarkveðjur
Starfsfólk Bárunnar, stéttarfélags.
https://www.asi.is/frettir-og-utgafa/frettir/almennar-frettir/andlat-halldor-gronvold/
Miðstjórn ASÍ mótmælir harðlega hækkun vaxtaálags banka og krefst þess að fjármálastofnanir skili vaxtalækkunum og lægri bankasköttum til neytenda.
Í kjarasamningum á almennum vinnumarkaði 2019, Lífskjarasamningunum, var samið um launahækkanir þar sem einkum var hugað að lægstu launum. Samið var um krónutöluhækkanir með það að markmiði að tryggja efnahagslega velsæld og aukna verðmætasköpun, bæta lífskjör almennings í landinu og skapa skilyrði fyrir lækkun vaxta.
Í kjölfar kjarasamninganna vorið 2019 skapaðist svigrúm til lækkunar vaxta eins og til stóð. Vaxtalækkanir hafa gengið eftir en meginvextir Seðlabanka Íslands eru nú 0,75% og hafa lækkað um 3,75 prósentustig frá byrjun síðasta árs. Fyrir komu kórónuveirunnar til landsins lækkuðu meginvextir Seðlabanka Íslands um 1,75 prósentustig, niður í 2,75%.
Því til viðbótar hafa stjórnvöld forgangsraðað þannig að bankaskattur verði lækkaður. Meginrökin fyrir lækkun skattsins eru þau að hann leiði til hærri vaxta til heimilanna. Með lagasetningu er unnið að lækkun bankaskatts sem nemur 7,7 milljörðum króna í fjórum þrepum á árunum 2020–2023 og ákveðið var að flýta þessari lækkun vegna Covid-19.
Það skýtur því skökku við að bankarnir ákveði við þessar aðstæður að hækka vaxtaálag. Gengur sú aðgerð þvert gegn markmiðum Lífskjarasamningsins og vinnur beinlínis gegn viðspyrnu í kjölfar COVID-kreppunnar. Með þessu taka bankarnir til sín stóran hlut af lækkun vaxta og axla ekki ábyrgð á erfiðum tímum. Á sama tíma eru bankarnir að auka hagnað sinn og eigið fé á kostnað heimila og fyrirtækja í landinu.
Miðstjórn ASÍ krefst þess að lækkun vaxta skili sér til almennings og að bankar hverfi frá áformum um hækkun vaxtaálags þegar í stað. Að öðrum kosti þarf að endurskoða nálgun stjórnvalda og hverfa frá áformum um lækkun bankaskatts en beita heldur öðrum aðferðum við að tryggja lága vexti til almennings.
Ályktun miðstjórnar ASÍ um skýrslu OECD um samkeppnismat á regluverki á sviðum byggingarstarfsemi og ferðaþjónustu á Íslandi
Miðstjórn Alþýðusambands Íslands lýsir yfir furðu á þeim tillögum um skerðingar á kjörum og réttindum launafólks sem er að finna í nýrri skýrslu Efnahags- og framfarastofnunar Evrópu (OECD) um samkeppnismat á regluverki á sviðum byggingarstarfsemi og ferðaþjónustu á Íslandi. Tillögurnar hljóma sem bergmál frá liðinni öld og eru lítt dulbúin viðleitni til að grafa undan velferðarríkinu í þágu atvinnurekenda og auðmagns.
Miðstjórn ASÍ telur það ámælisvert að íslensk stjórnvöld hafi árið 2019 gert samning við OECD um „framkvæmd á sjálfstæðu samkeppnismati á því regluverki sem gildir á sviðum byggingarstarfsemi og ferðaþjónustu á Íslandi”. Sú ákvörðun að birta tillögur þessar nú þegar alvarlegasta efnahagskreppa í manna minnum ríður yfir með gríðarlegu atvinnuleysi er sem blaut tuska framan í launafólk í landinu. Ekki er ljóst hvort dómgreindarbrestur fremur en óskammfeilni ræður þar för.
Miðstjórn ASÍ lýsir yfir eindreginni andstöðu við tillögur OECD þess efnis að felld verði niður lögverndun tiltekinna starfsgreina og að hark-hagkerfið verði innleitt á Íslandi á sviði leigubílareksturs. Hörmulegar afleiðingar hark-hagkerfisins eru vel þekktar í nágrannaríkjunum þar sem grafið er undan öryggi og þjónustu við neytendur, lækkun kostnaðar við þjónustu er alls ekki í hendi og vinnandi fólk býr við algert öryggisleysi.
Miðstjórn ASÍ leggur áherslu á að hvergi verði vikið frá reglum um lágmarksgæði bygginga og aðgengi fyrir alla. Tillögur OECD á sviði byggingariðnaðar miðast allar við hagsmuni verktaka og óráðlegt er að ganga að því sem vísu að lækkun byggingarkostnaðar komi íslensku launafólki til góða.
Miðstjórn ASÍ varar launafólk og landsmenn alla við tillögum OECD um breytt eignarhald á rekstri Keflavíkurflugvallar. Reynslan kennir að slíkar breytingar eru ekki gerðar í nafni almannahagsmuna enda er markmiðið jafnan að hleypa útvöldum og innmúruðum að almannagæðum í nafni „samkeppnishæfni” og „hagræðingar”.
Miðstjórn ASÍ áréttar varðstöðu um velferð og réttindi launafólks. Tillögur OECD eru til marks um hversu mjög fjármagnsöflunum er umhugað um að efna til „kapphlaups á botninn” undir yfirskyni „arðsemi” og „samkeppnishæfni” á kostnað launafólks. Telji íslensk stjórnvöld og atvinnurekendur að tillögur OECD endurspegli á einhvern veg afstöðu landsmanna til atvinnumála í ljósi reynslu af COVID-faraldrinum og þeim erfiðleikum sem honum fylgja eru þeir hinir sömu í furðu litlu sambandi við umhverfi sitt og samtíma. Almenningur á Íslandi gerir sér vitanlega ljóst að efnahagsþrengingar vegna COVID-faraldursins verða ekki linaðar með því að grafa undan afkomuöryggi og réttindum fólks og að þörf er fyrir samstöðu frekar en tillögur sem miða að því að sundra og veikja stoðir velferðar.
Samkvæmt kjarasamningum við sveitarfélögin er gert ráð fyrir því að starfsmenn sem nái 70 ára aldri láti af störfum án sérstakrar uppsagnar. Gildissvið þeirra ákvæða hefur nú verið þrengt með dómi Félagsdóms í málinu nr. 5/2020 frá 17.11 2020.
Verkalýðshreyfingin hefur byggt á því, að sé ákvæði kjarasamningsins ekki nýtt og haldi starfsmaður áfram störfum eftir það, sé réttarstaða hans hin sama og annarra starfsmanna þ.e. ráðningunni verði að ljúka með hefðbundinni uppsögn. Þetta hefur Félagsdómur nú staðfest í máli Verkalýðsfélags Vestfirðinga gegn Reykhólahreppi.
Gild rök má einnig færa fyrir því hvort ekki sé löngu tímabært að afnema þessi aldursákvæði kjarasamninga og þar sem þau er að finna í lögum enda mismunun á grundvelli aldurs bönnuð nema ríkar málefnalegar ástæður réttlæti annað. Þetta er nú tekið fram í lögum nr. 86/2018 en bann ákvæði laganna hvað aldur varðar tóku gildi 1.7 2019. Þó Félagsdómur vísi ekki sérstaklega til þessara laga eða reglna um bann við mismunun er hann gott innlegg í þá umræðu.
Sjá nánar umfjöllun á vinnuréttarvef ASÍ „Almennt bann við mismunun“ og frétt á heimasíðu ASÍ, www.asi.is
Enn er skrifstofa stéttafélaganna lokuð vegna fyrmæla sóttvarnaryfirvalda og verður áfram lokuð þar til yfirvöld taka ákvörðun um að létta þessum kvöðum. Þetta veldur félagsmönnum vissulega erfiðleikum og jafnvel auknu flækjustigi við að sinna erindum en við hjá Bárunni hvetjum fólk til að bíta á jaxlinn og þrauka eilítið lengur. Það er ljós við endann á göngunum og hillir undir eðlilegt líf með tilkomu bóluefna sem kynnt hafa verið síðustu dagana.
Fyrir þá sem þurfa að vera í sambandi við okkur minnum við á netfang Bárunnar, baran@baran.is og á símann 480 5000. Það er magnað hvað hægt er að gera með tækninni nú til dags og vegna mála sem er einhverra hluta vegna er ekki hægt að afgreiða gegnum síma eða tölvupóst þá er í einstaka tilvikum hægt að hitta starfsfólk gegnum fjarfundabúnað og í undantekningartilvikum, í eigin persónu. Það þarf þó að gerast með fyrirvara eftir nánara samkomulagi við starfsfólk skrifstofunnar.
En þó hér sé Covid sem breytt hefur gangi lífsins fyrir okkur þá heldur lífið áfram og sumt getur ekki beðið. Það styttist í jólin og rétt að huga að atriðum sem máli skipta. Til dæmis má vekja athygli á að um næstu mánaðarmót á launafólk að fá greidda Desemberuppbót. Við viljum hvetja fólk til að fylgjast með hvort hún skilar sér ekki örugglega. Hún er eilítið mismunandi milli kjarasamninga en hér á síðunni má sjá hvaða upphæðir eru til útborgunar miðað við hvar og á hvaða samningum fólk er að vinna.
Almennt fylgir þessi greiðsla með útborgun 1.desember t.d. hjá ríki og sveitarfélögum en í almenna kjarasamningnum er ákvæði um að greiða skuli desemberuppbót ekki seinna en 15.desember. Í öllu falli er rétt að passa upp á að þessi uppbót skili sér. Ef uppbótin skilar sér ekki um mánaðarmótin er rétt að spyrja launagreiðanda hverju sætir og ef svör eru ekki fullnægjandi þá er rétt að setja sig í samband við stéttarfélagið fyrr en seinna. Fyrir þá sem eru atvinnulausir nú um mundir eða eru á svokallaðri hlutabótaleið er rétt að setja sig í samband við Vinnumálastofnun.
Við viljum biðjast afsökunar fyrir okkar hönd fyrir að þurfa fara þessa leið en annað er ekki boði vegna fyrrnefndra fyrirmæla og ekki annað að gera en gera það besta úr stöðunni í góðri samvinnu við félagsmenn og aðra sem erindi eiga við Báruna.
Það er mikið hagsmunamál fyrir launafólk að geta farið yfir með tiltölulega einföldum hætti hvort laun og aðrar greiðslur séu í samræmi við kjarasamninga, þ.e. kannað hvort þeirra launaseðill sé réttur.
Starfsgreinasambandið, fyrir hönd allra sinna aðildarfélaga, hefur látið setja upp reiknivél þar sem félagsmenn geta nýtt sér til að reikna út laun sín, kannað hvort launaseðlar þeirra séu réttir og annað það sem snertir margvíslegar greiðslur.
Leitast hefur verið við að hafa reiknivélina eins einfalda í notkun og kostur er og má því búast við að hún nái ekki utan um öll möguleg tilfelli. Hér er um fyrstu útgáfu að ræða og m.a. á eftir að leggja lokahönd á þýðingar og fleira. Notendur eru beðnir að koma ábendingu og athugasemdum á framfæri á sgs@sgs.is.
Með þessu framtaki er verið að leitast við að efla þjónustuna við félagsmenn og gera þeim auðveldara að gæta sinna hagsmuna og kjara.
Mest hækkaði vörukarfan í Nettó, um 2,6% og næst mest í Bónus, 2,4%. Minnst hækkaði vöruakarfan í Hagkaup milli mælinga eða um 0,5% en í 6 tilfellum af 7 hækkaði vörukarfan 1,5%-2,6%. Verð hækkaði í flestum vöruflokkum en minnstu verðhækkanirnar voru í flokki grænmetis og ávaxta og kjötvara og lækkaði verð í þeim vöruflokkum í einhverjum tilfellum. Verðmælingar fóru fram vikurnar 18-25. maí og 2.- 9. nóvember 2020.
Vörukarfan hækkar um 2,6% í Nettó og 2,4% í Bónus
Mest hækkaði vörukarfan eins og áður segir í Nettó um 2,6%. Munar þar mestu um hækkun drykkjarvara 5,6% og hækkun á mjólkurvörum og ostum, 5,1%. Næst mest hækkaði vörukarfan í Bónus, 2,4% en þar hækkuðu grænmeti og ávextir mest eða um 6,8% og þá hækkuðu mjólkurvörur og ostar um 4,5%.
Minnst hækkaði vörukarfan í Hagkaup, 0,5% en þar lækkaði verð á kjötvöru um 1,8% milli mælinga. Sykur, súkkulaði og sælgæti lækkaði einnig lítillega í verði í Hagkaup en verð á brauði- og kornvörum stóð nánast í stað milli mælinga. Drykkjarvörur hækkuðu þó mikið í Hagkaup eða um 6,2%.
Af lágvöruverðsverslununum Bónus, Krónunni og Nettó hækkaði verð minnst í Krónunni, um 1,5% samanborið við 2,4% verhækkun á vörukörfunni í Bónus og 2,6% í Nettó. Ef litið er til annara verslana sem teljast ekki til lágvöruverðsverslana og eru ýmist með lengri opnunartíma eða eru staðsettar á fleiri stöðum á landinu má sjá að vörukarfan í Iceland hækkar mest eða um 2,1% samanborðið við 1,8% hækkun á vörukörfunni í Kjörbúðinni og 1,7% í Krambúðinni.
Verð á kjötvöru hækkar lítið og grænmeti og ávextir lækka í verði í sumum tilfellum
Ef verðhækkanir eru skoðaðar eftir vöruflokkum má í mörgum tilfellum sjá að töluverðar verðhækkanir í flestum vöruflokkum. Í mörgum tilfellum má sjá miklar verðhækkanir á brauði- og kornvöru, mjólkurvörum og og ostum og á drykkjarvöru. Sykur, súkkulaði og sælgæti hækkar einnig töluvert í sumum verslunum en lítið í öðrum. Þá hækkar ýmis matavara mikið í sumum verslunum en í þeim flokki eru vörur eins og fiskur, pakkavörur og niðursuðuvörur.
Grænmeti og ávextir og kjötvara hækkar minnst og sjaldnast í verði milli mælinga. Í sumum verslunum lækkar verð á grænmeti og ávöxtum milli mælinga en grænmeti og ávextir er sá flokkur matvara sem sveiflast hvað mest í verði. Mjög miklar verðhækkanir urðu á grænmeti og ávöxtum í vor eftir að Covid faraldurinn fór af stað og í síðustu verðmælingu sem náði yfir heilt ár mátti sjá að grænmeti hafði í mörgum tilfellum hækkað í kringum 20%.
Í flestum tilfellum hækkar verð á kjötvörum í matvöruverslunum lítið eða lækkar milli mælinga en undantekningin er 2,4% hækkun á kjötvörum í Iceland.
Í verðtöflunni hér að neðan má sjá verðhækkanir í einstaka vöruflokkum í verslunum. Ef ýtt er á heitið á vöruflokknum raðast verslanirnar eftir því í hvaða verslun viðkomandi vöruflokkur hækkaði mest/minnst.
Um könnunina
Vörukarfan var framkvæmd vikurnar 18-25. maí 2020 og vikuna 2.- 9. nóvember.
Verðlagseftirlitið mælir breytingar á verði vörukörfu sem getur endurspeglað almenn innkaup meðalheimilis. Vörukarfa ASÍ inniheldur allar almennar matar- og drykkjarvörur, t.d. brauðmeti, morgunkorn, pasta, kjöt, fisk, grænmeti, ávexti, pakkavörur, kaffi, gos, og safa. Við samsetningu vörukörfunnar voru hafðar til hliðsjónar vogir Hagstofunnar sem notaðar eru til útreiknings á vísitölu neysluverðs. Vogirnar segja til um hversu stór hluti tilteknir vöruflokkar eru af neyslukörfu meðal heimilis.
Verðbreytingar voru skoðaðar í eftirfarandi verslunum: Bónus, Krónunni, Nettó, Hagkaup, Kjörbúðinni, Iceland og Krambúðinni.
Þess ber að geta að hér eru einungis birtar upplýsingar um verðbreytingar milli verðmælinga. Ekki er því um beinan verðsamanburð að ræða þ.e.a.s. hvar ódýrustu vörukörfuna var að finna. Einnig er rétt að athuga að skoðuð eru þau verð sem eru í gildi í verslununum á hverjum tíma og geta tilboð á einstaka vöruliðum því haft áhrif á niðurstöðurnar.
Óheimilt er að vitna í niðurstöðurnar í auglýsingum og við sölu nema með heimild ASÍ.