Category: Fréttir

FIMMTA ÞING SGS SETT

Fimmta reglulega þing Starfsgreinasambands Íslands var sett kl. 10 í morgun með ræðu Björns Snæbjörnssonar, formanns sambandsins. Þingstörfum lýkur á morgun, 15. október, Þingið er haldið á Hótel Natura í Reykjavík, en yfirskrift þingsins að þessu sinni er „Sterkari saman í 15 ár“. Eftir að ræðu Björns lauk fluttu Eygló Harðardóttir, félags- og húsnæðismálaráðherra, og Gylfi Arnbjörnsson, forseti ASÍ, ávörp. 

SAMNINGUR VIÐ RÍKIÐ UNDIRRITAÐUR

Samninganefndir Starfsgreinasambandsins og Flóabandalagsins undirrituðu samning við samninganefnd ríkisins í dag (7. október 2015), vegna starfsfólks aðildarfélaga Starfsgreinasambandsins hjá ríkisstofnunum. Samningurinn er á svipuðum nótum og samið var um á almennum markaði í vor og gildir hann frá 1. maí síðastliðnum. Hækkun frá 1. maí er 25.000 krónur. Þann 1. júní árið 2016 hækka laun um 5,5%, að lágmarki 15.000 krónur auk breytinga á launatöflu. Ári síðar, eða 1. júní 2017,  hækka laun um 4,5% og 1. júní 2018 hækka laun um 3%. Samningurinn gildir til 31. mars árið 2019 og kemur þá til sérstök eingreiðsla 1. febrúar 2019 uppá 45.000 krónur fyrir starfsfólk í fullu starfi og hlutfallslega fyrir starfsfólk í hlutastarfi.  Lágmarkslaun eru hækkuð til samræmis við það sem samið var um á hinum almenna vinnumarkaði og verða 300.000 krónur frá 1. júní 2018 fyrir starfsmenn 18 ára og eldri sem starfað hafa fjóra mánuði samfellt hjá sömu stofnun. Framlag í þróunar- og símenntunarsjóði verður hækkað í 0,82% auk þess sem aukið framlag verður sett í stofnanasamninga samkvæmt sérstakri bókun.

Um samninginn:

• Kjarasamningurinn felur í sér verulegar launahækkanir við upphaf samnings þar sem að launataxtar hækka um 25.000 kr. eða að meðaltali um 9,78%.
• Launataxtar hækka um 15.000 kr. þann 1. júní 2016 auk leiðréttingar á launatöflu sem jafngildir 5,9% hækkun að meðaltali.
• Þann 1. júní 2017 hækka launataxtar um 4,5%
• Þann 1. júní 2018 hækka laun um 3%.
• Sérstök eingreiðsla kemur 1. febrúar 2019 að upphæð kr. 45.000, miðað við þá sem eru í fullu starfi 1. janúar 2019 og hlutfallslega fyrir þá sem eru í hlutastarfi.
• Lagðar verða til 30 milljónir árlega árin 2016 – 2018 til þess að samræma stofnanasamninga þar sem horft verður til þess að leiðrétta sérstaklega þá hópa sem eru með lægri röðun í launatöflu en aðrir sambærilegir hópar.
• Framlag í fræðslusjóð eykst úr 0,67% í 0,82% sem er mjög jákvætt skref til þess að efla félagsmenn enn frekar í starfi.
• Launataxtar fyrir tímamælda ákvæðisvinnu í ræstingum hækka um tæplega 34% á samningstímanum.
• Tekjutryggingin hækkar um 86.000 kr. á samningstímanum og verður komin í 300.000 kr. frá 1. júní 2018.
• Orlofsuppbót hækkar um 21,5% á samningstímanum og fer í 42.000 kr. við upphaf samnings en verður komin í 48.000 kr. í lok samnings.
• Desemberuppbót hækkar um tæplega 21% og fer í 78.000 kr. á árinu 2015 en 89.000 í lok samningstíma.

Samninginn í heild sinni má nálgast hér.

Samningurinn verður á næstunni lagður fyrir félagsmenn aðildarfélaga Starfsgreinasambandsins.  Félög sem veitt hafa Starfsgreinsambandinu umboð munu halda sameiginlega rafræna atkvæðagreiðslu. SGS hvetur alla félagsmenn á kjörskrá til að nýta atkvæðisrétt sinn og greiða atkvæði með samningnum.

Frétt tekin af vef Starfsgreinasambandsins.

Nýr framkvæmdastjóri ASÍ í heimsókn

Við fengum góða gesti hingað á skrifastofuna í vikunni.

Mættar voru til okkar nýráðinn framkvæmdastjóri ASÍ Guðrún Ágústa Guðmundsdóttir, Kristín Ýr Gunnarsdóttir verkefnastjóri kynningar og upplýsingarmála, sem einnig er nýlega byrjuð á skrifstofu ASÍ og, Eyrún Björk Valsdóttir deildarstjóri MFA fræðslusviðs og starfsmannastjóri Alþýðusambandsins . Þeim var auðvitað tekið fagnandi enda bæði gott og gaman að fá góða gesti og ekki verra að fá að ræða beint við fólk úr forystunni og þá aðila sem móta og framfylgja stefnu verkalýðshreyfingarinnar. Svona samtöl milli okkar starfsmanna á plani og þeirra sem eru nær hringiðunni í höfuðborginni eru algerlega nauðsynleg og geta aldrei orðið til annars en að efla starfið.

Á stuttum fundi yfir kaffi og meðlæti var rætt um margt af því sem efst hefur verið á baugi í starfi ASÍ en ekki síður félaganna á staðnum. Við hér á skrifstofunni fengum tækifæri til að viðra skoðanir okkar og hvar okkur þætti að auka mætti áherslur miðað við okkar reynslu. Farið var vítt yfir sviðið, rætt var um launakjör á svæðinu, vinnustaðaeftirlit, samvinnu við ýmsar stofnanir, samvinnu félaga á svæðinu og hvernig skrifstofa ASÍ gæti stutt við starfið út í félögunum. Fyrir utan hversu skemmtilegar þessar konur voru þá fannst okkur bæði gagnlegt og fræðandi að fá þessa heimsókn og vonum við að framhald verði á í framtíðinni. Við vonum líka að þær hafi orðið einhvers vísari um lífið og verkalýðsbaráttuna út á landi.

Við viljum að endingu þakka fyrir heimsóknina og um leið bjóða þær Guðrúnu Ágústu og Kristínu Ýr velkomnar til starfa. Eyrúnu Björk þekkjum við vel frá fyrri tíð og höfum átt við hana ánægjulegt samstarf.

FINNSK STJÓRNVÖLD RÁÐAST Í AÐGERÐIR GEGN LAUNAFÓLKI

Fyrir skemmstu kynntu finnsk stjórnvöld nýjar tillögur sem miða að því að skerða einhliða laun og ýmis önnur ákvæði í kjarasamningum sem nú þegar hefur verið samið um. Það er skemmst frá því að segja að finnsk stéttarfélög brugðust ókvæða við tillögunum og höfnuðu þeim alfarið enda kveða þær á um meiriháttar skerðingar á yfir-, helgar- og næturvinnu, skerðingu á veikindarétti og sjúkradagpeningum, takmörkunum á orlofsrétti launafólks ásamt fleiru.

Eftir að stéttarfélögin í Finnlandi höfnuðu tillögunum formlega tilkynnti finnska ríkisstjórnin röð aðgerða/lagafrumvarpa sem munu koma illa niður á launafólki þar í landi, en finnsku stéttarfélögin áætla að áhrifin af boðuðum aðgerðum stjórnvalda muni nema 4-6% lækkun á launum. Og ekki nóg með það heldur muni aðgerðirnar bitna verst á viðkvæmum launahópum, s.s. fólki í hlutastörfum og konum.

Í ljósi þessa hafa hin ýmsu stéttarfélög í Finnlandi boðað til víðtækra mótmælaaðgerða þann 18. september til  að mótmæla boðuðum aðgerðum stjórnvalda – aðgerðum sem brjóta m.a. í bága við bága samþykktir ILO og alþjóðlega og evrópska mannréttindasamninga.

Starfsgreinasambandið hefur sent finnskum félögum sínum stuðningsyfirlýsingu þar sem sambandið lýsir yfir fullum stuðningi við baráttu þeirra gegn tillögum ríkisstjórnarinnar.

Tekið af heimasíðu SGS