Category: Fréttir

Opnunartími skrifstofu

Skrifstofa Bárunnar, stéttarfélags verður opin milli jóla og nýárs, föstudaginn 27. og mánudaginn 30. desember, frá kl. 8-16, en lokað verður  fyrir hádegi á aðfangadag og gamlársdag.  Þann 2. janúar á nýju ári verður opnað kl. 8:00.

Báran skrifaði ekki undir kjarasamning

Báran, stéttarfélag skrifaði ekki undir fyrirliggjandi kjarasamning í gær. Samningurinn og samkomulag við ríkistjórnin eykur enn meira en áður á misskiptinguna í samfélaginu. Nánar skýringar verða birtar hér á heimasíðunni á morgun. 

Búið að undirrita kjarasamninga

Kjarasamningurinn sem aðildarsamtök Alþýðusambands Íslands undirrituðu í kvöld við Samtök atvinnulífsins er svokallaður aðfarasamningur. Auk launabreyinga gefur samningurinn aðilum 12 mánuði til að undirbúa gerð langtímasamnings sem á að tryggja stöðugleika í íslensku efnahagslífi og kaupmáttaraukningu til framtíðar. Vinna við undirbúning slíks langtímasamnings hefst strax í byrjun nýs árs. Með samningnum er tekin upp sú nýbreytni að gengið er frá sérstakri viðræðuáætlun sem unnið verður eftir með tímasettum markmiðum um framvindu.

Aðildarsamtök ASÍ settu sér það markmið með  nýjum kjarasamningi að auka kaupmátt, hækka lægstu laun umfram önnur laun, tryggja lága verðbólgu og undirbyggja stöðugleika. Þessir kjarasamningar eru mikilvægt skref í þessari stefnumótum, þar sem tekist hefur að tryggja helstu markmiðin. Nýi kjarasamningurinn gildir frá 1. janúar til 31. desember 2014.

Mikill verðmunur á jólamatvöru

Verðlagseftirlit ASÍ gerði verðkönnun á jólamatvöru í 9 matvöruverslunum á höfuðborgarsvæðinu og Akureyri sl. mánudag. Kannað var verð á 89 matvörum sem eru mikið keyptar fyrir jólahátíðina. Bónus var með lægsta verðið í 48 tilvikum af 89 og Krónan í 13. Samkaup-Úrval var með hæsta verðið í 45 tilvikum af 89 og Nóatún í 16.

Mestur verðmunur í könnuninni reyndist á Oskar andarkrafti sem var dýrastur á 534 kr. hjá Iceland en ódýrastur á 279 kr. hjá Bónus, verðmunurinn er 255 kr. eða 91%. Mikill verðmunur var einnig á Þykkvabæjar forsoðnum skyndikartöflum 2*500 gr. voru þær dýrastar á 619 kr. hjá Samkaupum-Úrvali en ódýrastar á 459 kr. hjá Bónus, verðmunurinn 160 kr. eða 35%.

Minnstur verðmunur reyndist vera á MS ¼ l af rjóma sem var dýrastur á 239 kr. hjá Víði en ódýrastur á 228 kr. hjá Nettó sem er 5% verðmunur. Það var einnig 5% verðmunur á Mjólku mangó/ástaraldinskyrtertu 600 gr. sem var dýrust á 1.154 kr. hjá Samkaupum–Úrvali en ódýrust á 1.098 kr. hjá Krónunni og Iceland. Benda má á að verðmunur á mjólkurvörum fór aldrei yfir 30% af þeim vörutegundum sem skoðaðar voru.

Af öðrum vörum má t.d. nefna að mikill verðmunur var á 135 gr. konfektkassa frá Nóa sem var ódýrastur á 798 kr. hjá Bónus en dýrastur á 1.089 kr. hjá Nóatúni sem gerir 36% verðmun. Einnig var mikill verðmunur á Ora jólasíld 630 gr. sem var ódýrust á 748 kr./st. hjá Hagkaupum en dýrust á 998 kr./st. hjá Iceland sem er 33% verðmunur. KEA úrbeinað hangilæri var ódýrast á 3.195 kr./kg. hjá Bónus en dýrast á 3.898 kr./kg. hjá Samkaupum–Úrvali sem er 22% verðmunur.

Sjá nánari upplýsingar á heimasíðu ASÍ

Kannað var verð á 89 matvörum s.s. kjötvörum, mjólkurvörum, kökum, konfekti, drykkjarvörum, grænmeti og ávöxtum. Í könnuninni var skráð niður hilluverð vöru sem er það verð sem neytandinn hefur upplýsingar um inni í búðinni að hann eigi að greiða fyrir vöruna. Þegar skýrt er gefið til kynna að veittur sé afsláttur/tilboðsverð af merktu verði við kassa var skráð afsláttarverð. Til að auðvelda verðsamanburð er skráð mælieiningaverð vöru, þar sem pakkastærðir eru mismunandi eftir verslunum. Tilboð eru víða í matvöruverslunum nú fyrir hátíðarnar og verðbreytingar tíðar. Neytendur ættu því að vera vel vakandi vilji þeir gera hagstæð innkaup á jólamatnum.

Könnunin var gerð á sama tíma í eftirtöldum verslunum: Bónus Holtagörðum, Krónunni Granda, Nettó Akureyri, Iceland, Víði Skeifunni, Fjarðarkaupum Hafnarfirði, Nóatúni Háaleitisbraut,  Samkaupum – Úrvali Hafnarfirði og Hagkaupum Kringlunni.

Hér er aðeins um beinan verðsamanburð að ræða, en ekki er lagt mat á gæði eða þjónustu söluaðila.

Tekið af heimasíðu ASÍ

Svört atvinnustarfsemi í ferðaþjónustu áhyggjuefni

Í hádegisfréttum Bylgjunnar sl. sunnudag var birt viðtal við Halldóru S. Sveinsdóttur formann Bárunnar  um svarta atvinnustarfssemi. Þar kom fram að svört atvinnustarfsemi í ferðaþjónustu virðist  sífellt vera að aukast og við því þurfi að bregðast. Niðurstöður úr vinnustaðaeftirliti ASÍ og SA staðfesta þessar upplýsingar.

Viðtalið er hægt að nálgast  í  frétt á vefnum vísir.is

Lægsta verðið var oftast að finna í verslun Bónus

Verðlagseftirlit ASÍ gerði verðsamanburð á jólabókum í átta bókabúðum og verslunum  víðsvegar um landið sl. mánudag. Kannað var verð á 75 bókatitlum sem eru í bókatíðindum 2013.

Eymundsson, Griffill Skeifunni, Mál og menning Laugavegi og Iða Lækjargötu töldu það ekki þjóna hagsmunum sínum að verðlagseftirlitið upplýsti neytendur um verð í þeirra verslun.
Oftast var á milli fjórðungs og helmings verðmunur á hæsta og lægsta verði milli verslananna. Lægsta verðið var oftast að finna í verslun Bónus á Egilsstöðum eða á 34 titlum af 75 og hjá Forlaginu Fiskislóð á 16 titlum.

Mikill munur á vöruúrvali
Mikill munur er á vöruúrvali á milli verslana og bókabúða.  Af þeim bókatitlum sem könnunin náði til voru flestir þeirra fáanlegir hjá Forlaginu Fiskislóð eða 71 af 75 og Hagkaup átti til 68, Bóksala Stúdenta 67 og A4 66. Fæstir bókatitlarnir voru til hjá Krónunni Lindum eða 25 af 75, Samkaupum-Úrvali Hafnarfirði 34 titlar og Bónus 35.
Mestur verðmunur í könnuninni var á bókinni Fiskarnir hafa enga fætur eftir Jón Kalman Stefánsson, sem ódýrust hjá Bónus á 4.218 kr. en dýrust hjá A4 á 6.490 kr. sem er 2.272 kr. verðmunur eða 54%. Minnstur verðmunur í könnuninni var á bókinni Möltugátan eftir Jorn Lier Horst sem var ódýrust hjá A4 Skeifunni á 2.990 kr. en dýrust hjá Hagkaupum á 2.999 kr. sem gerir verðmun upp á 9 kr.

Mikill verðmunur á öllum titlum
Sem dæmi um mikinn verðmun á titlum fyrir jólin má nefna að bókin Tímakistan eftir Andra Snæ Magnason. Hún var ódýrust á 2.975 kr. hjá Bónus en dýrust á 4.390 kr. hjá A4, verðmunurinn eru 1.415 kr. eða 48%. Matargleði Evu eftir Evu Laufey Kjaran Hermannsdóttur var ódýrust á 3.485 kr. hjá Bónus en dýrust á 4.490 kr. hjá Bóksölu Stúdenta eða 29% verðmunur. Sagan Manga með svartan vanga – sagan öll eftir Ómar Ragnarsson var ódýrust á 2.745 kr. hjá Bónus en dýrust á 3.790 kr. hjá Hagkaupum sem er 38% verðmunur. Einnig má nefna að bókin Stangveiði á Íslandi og íslensk vatnabók eftir Sölva Björn Sigurðsson var ódýrust á 21.743 kr. hjá Nettó en dýrust á 23.990 kr. hjá Forlaginu, verðmunurinn er 10%.

Sjá töflu á heimasíðu ASÍ.
 
Eymundsson, Griffill, Mál og menning Laugavegi og Iða Lækjargötu neituðu þátttöku í könnuninni
Könnunin var gerð í eftirtöldum verslunum á sama tíma: Forlaginu Fiskislóð, A4 Skeifunni, Bóksölu Stúdenta Sæmundargötu, Nettó Akureyri, Hagkaupum Holtagörðum, Bónus Egilsstöðum, Krónunni Lindum og Samkaupum Úrval Hafnarfirði.
Hér er aðeins um beinan verðsamanburð að ræða, en ekki er lagt mat á gæði eða þjónustu söluaðila. Neytendur ættu einnig að hafa hugfast að verð á algengum bókatitlum breytast oft ört í verslunum á þessum árstíma.

Tekið af heimasíðu ASÍ

Kjaraviðræðum hætt

Samninganefnd ASÍ hefur á undanförnum vikum unnið að því að leggja grunn að aðfarasamningi við Samtök atvinnulífsins, þar sem þess yrði freistað að ná auknum kaupmætti, tryggja stöðugleika í efnahagsmálum og lága verðbólgu. Ágætur árangur hefur náðst um umgjörð slíks samnings. Í dag kom hins vegar í ljós djúpstæður ágreiningur við SA um launalið væntanlegs samnings, einkum það sem snýr að hækkun lægstu launa. Svo langt er á milli aðila að samninganefnd ASÍ telur forsendur brostnar fyrir þeirri leið sem átti að varða. SA hafnar þeirri kröfu ASÍ að hækka lægstu laun um ákveðna krónutölu.
 Því hefur samninganefnd ASÍ tilkynnt SA að viðræðum á þessum grunni sé hætt. Framhald viðræðna um gerð nýrra kjarasamninga er í höndum aðildarsamtaka ASÍ.

Tekið af heimasíðu ASÍ