Category: Fréttir

Burt með láglaunastefnuna

Félagsfundur Bárunnar, stéttarfélags var haldinn í gærkvöldi á Hótel Selfossi.  Kosnir voru fulltrúar á þing ASÍ sem haldið verður dagana 17 – 19. október nk. Báran á þar þrjá fulltrúa af um það bil 290. Fulltrúar Bárunnar verða Halldóra Sigríður Sveinsdóttir formaður, Örn Bragi Tryggvason varaformaður og Hjalti Tómasson varamaður í stjórn.

Miklar umræður urðu um stöðu atvinnumála og komu fram þungar áhyggjur fundarmanna af væntanlegri endurskoðun samninga. Ekki þótti mikil ástæða til bjartsýni eins og kemur fram í eftirfarandi ályktun sem fundurinn samþykkti í lok fundar.

Á fundinum kynnti formaðurinn þjónustukönnun sem framkvæmd var meðal aðildarfélaga Starfsgreinasambandsins. Þar kemur fram það mat að Báran stendur sig vel í samanburði við önnur félög, sérstaklega þegar kemur að þjónustu við félagsmenn og er vel statt fjárhagslega. Nokkrar breytingar hafa orðið á starfseminni síðustu misseri og er ekki annað að sjá en félagið sé á réttri leið.

Hér er ályktunin sem fundurinn sendir frá sér:

Félagsfundur Bárunnar, stéttarfélags haldinn á Hótel Selfossi 19. september 2012 krefst þess að ríkisvaldið standi að fullu við þau loforð sem gefin voru í tengslum við kjarasamning sem undirritaður var árið 2011.

Svikin hafa verið loforð um sambærilega hækkun launa og almannatrygginga og hvar er atvinnuuppbyggingin eða úrbæturnar í atvinnumálunum sem gefa einhverja ástæðu til bjartsýni? Verðbólgumarkmið hafa ekki náðst og reikningurinn lendir af því meiri þunga á fólki eftir því sem launin eru lægri.

Meðan launaskrið er hafið í sumum starfsgreinum eru kjör þeirra lægst launuðu enn undir hungurmörkum. Verði ekki staðið við gefin loforð munu kjör þeirra sem fastir eru í viðjum lámarkstaxta versna til muna.

Fundurinn krefst þess að horfið verði frá þeirri láglaunastefnu sem ríkisvaldið hefur forgöngu um með aðgerðum sínum. Það getur ekki verið þjóðhagslega hagkvæmt að halda hluta þjóðarinnar í fátækragildru,  sem leggur sífellt meir byrðar á herðar ríkisvalds og sveitarfélaga á kostnað þeirra sem þó hafa haldið vinnu sinni. Lægstu taxtar verða að hækka og þeirri fullyrðingu að launahækkanir þeirra launalægstu skapi óstöðugleika í efnahagslífinu er vísað til föðurhúsanna. Þar er annarra skýringa að leita.

Félagsfundur Bárunnar, stéttarfélags minnir á að félagið var eitt þriggja aðildarfélaga ASÍ sem vildi fella samningana við síðustu endurskoðun. Þá kom fram að ástæðan var fyrst og fremst vantraust á ríkisstjórnina sem því miður virðist hafa verið á rökum reist.

Báran, stéttarfélag krefst þess að íslenskt launafólk verði losað út úr viðjum þeirrar  láglaunastefnu sem rekin er í íslensku samfélagi.

Forseti ASÍ heimsótti stjórn Bárunnar, stéttarfélags í gær

Í gærkvöldi  heimsótti Gylfi Arnbjörnsson forseti ASÍ stjórn Bárunnar í fundarsal Þjónustuskrifstofu stéttarfélaganna á Suðurlandi. Þessar vikurnar er Gylfi í mánaðarlangri fundaherferð um landið með stjórnum langflestra þeirra stéttarfélaga sem eiga aðild að ASÍ. Markmið forseta á þessum fundum að heyra í fólki í grasrótinni, áherslur þess og væningar. Gylfi kynnti starf ASÍ í vetur og áherslur hreyfingarinnar í hinum ýmsu málum.  Fundarefnin voru m.a.  atvinnumál, lífeyrismál og staða kjarasamninga. Framundan er endurskoðun kjarasamninga og eru blikur á lofti varðandi forsendur þeirra. Fram kom að markmið um stöðuga verðbólgu á samningastímanum hefðu ekki gengið eftir. Forsendur um gengi krónnunar stóðust ekki eins og búist var við og margt fleira.  Á fundinum urðu líflegar umræður um þessi mál. Stjórn Bárunnar, stéttarfélags hefur verið ósátt með ýmislegt í innra starfi verkalýðshreyfingarinnar og þurfti Gylfi að svara mörgum spurningum um þau mál. Gylfi tilkynnti á fundinum að hann ætlar að bjóða sig fram til endurkjörs á þing ASÍ sem haldið verður í október n.k.

Samningur um leigu á fræðslusetri undirritaður

Í dag var undirritaður samningur Háskólafélags Suðurlands og Fræðslunets Suðurlands  við Sveitarfélagið Árborg um leigu á Sandvíkurskóla á Selfossi. Í húsinu verða m.a. Fræðslunet Suðurlands, Háskólafélagið, Markaðsstofa Suðurlands, Réttargæslumaður fatlaðra á Suðurlandi og Rannsóknarsetur Háskóla Íslands. Samningurinn er til 10 ára. Fram kom í ræðu Eyþórs Arnalds formanns bæjarráðs Árborgar að um væri að ræða einn stærsta viðburð í sögu skólamála á Suðurlandi.  Mikil ánægja er með þessa nýju og glæsilegu aðstöðu og var samningnum vel fagnað af þeim sem voru viðstaddir undirritunina. 

Nýr framkvæmdastjóri hjá Starfsgreinasambandi Íslands

Drífa Snædal hefur verið ráðin framkvæmdastjóri Starfsgreinasambands Íslands og tekur til starfa 17. september næstkomandi. Fráfarandi framkvæmdastjóri, Kristján Bragason starfar við hlið Drífu til áramóta. Drífa hefur nýlokið meistaragráðu í vinnurétti frá háskólanum í Lundi í Svíþjóð en er einnig menntuð tækniteiknari frá Iðnskólanum í Reykjavík og viðskiptafræðingur frá Háskóla Íslands. Áður hefur hún starfað sem framkvæmdastýra Vinstrihreyfingarinnar – græns framboðs og Samtaka um Kvennaathvarf. Drífa hefur látið sig málefni vinnumarkaðarins varða bæði í gegnum Iðnnemasamband Íslands á árum áður og í gegnum nám sitt. Í lokaverkefni sínu í viðskiptafræði fjallaði Drífa um kjarasamningagerð og launamun kynjanna en meistararitgerðin fjallaði um lagaumhverfi starfa sem unnin eru inni á heimilum. Þá hafa jafnréttismál verið henni hugleikin og hefur hún skrifað fjölmargar greinar og pistla á því sviði. Drífa er búsett í Reykjavík ásamt dóttur sinni.

Um SGS

Starfsgreinasamband Íslands (SGS) er landsamband almenns og sérhæfðs verkafólks. SGS er stærsta landssamband innan ASÍ, en 19 verkalýðsfélög eiga aðild að sambandinu með um 50 þúsund félagsmenn.

Aðildarfélög SGS eru þessi:

Báran stéttarfélag,  Efling-stéttarfélag, Vlf. Akraness, Stéttarfélag Vesturlands, Vlf. Snæfellinga, Vlf. Vestfirðinga, Vlsfél. Bolungarvíkur, Stéttarfélagið Samstaða, Aldan stéttarfélag, Eining-Iðja, Framsýn stéttarfélag, Vlf. Þórshafnar, Afl-Starfsgreinafélag, Vlf. Suðurlands, Drífandi stéttarfélag, Vfl. Grindavíkur, Vlsfél. Keflavíkur og nágrennis (VSFK), Vlsfl. Sandgerðis og Vlf. Hlíf.