Við vinnum fyrir þig

Translate to

Fréttir

Báran stéttarfélagFréttir
Fréttir thor

Lægsta verðið var oftast að finna í verslun Bónus

Verðlagseftirlit ASÍ gerði verðsamanburð á jólabókum í átta bókabúðum og verslunum  víðsvegar um landið sl. mánudag. Kannað var verð á 75 bókatitlum sem eru í bókatíðindum 2013.

Eymundsson, Griffill Skeifunni, Mál og menning Laugavegi og Iða Lækjargötu töldu það ekki þjóna hagsmunum sínum að verðlagseftirlitið upplýsti neytendur um verð í þeirra verslun.
Oftast var á milli fjórðungs og helmings verðmunur á hæsta og lægsta verði milli verslananna. Lægsta verðið var oftast að finna í verslun Bónus á Egilsstöðum eða á 34 titlum af 75 og hjá Forlaginu Fiskislóð á 16 titlum.

Mikill munur á vöruúrvali
Mikill munur er á vöruúrvali á milli verslana og bókabúða.  Af þeim bókatitlum sem könnunin náði til voru flestir þeirra fáanlegir hjá Forlaginu Fiskislóð eða 71 af 75 og Hagkaup átti til 68, Bóksala Stúdenta 67 og A4 66. Fæstir bókatitlarnir voru til hjá Krónunni Lindum eða 25 af 75, Samkaupum-Úrvali Hafnarfirði 34 titlar og Bónus 35.
Mestur verðmunur í könnuninni var á bókinni Fiskarnir hafa enga fætur eftir Jón Kalman Stefánsson, sem ódýrust hjá Bónus á 4.218 kr. en dýrust hjá A4 á 6.490 kr. sem er 2.272 kr. verðmunur eða 54%. Minnstur verðmunur í könnuninni var á bókinni Möltugátan eftir Jorn Lier Horst sem var ódýrust hjá A4 Skeifunni á 2.990 kr. en dýrust hjá Hagkaupum á 2.999 kr. sem gerir verðmun upp á 9 kr.

Mikill verðmunur á öllum titlum
Sem dæmi um mikinn verðmun á titlum fyrir jólin má nefna að bókin Tímakistan eftir Andra Snæ Magnason. Hún var ódýrust á 2.975 kr. hjá Bónus en dýrust á 4.390 kr. hjá A4, verðmunurinn eru 1.415 kr. eða 48%. Matargleði Evu eftir Evu Laufey Kjaran Hermannsdóttur var ódýrust á 3.485 kr. hjá Bónus en dýrust á 4.490 kr. hjá Bóksölu Stúdenta eða 29% verðmunur. Sagan Manga með svartan vanga – sagan öll eftir Ómar Ragnarsson var ódýrust á 2.745 kr. hjá Bónus en dýrust á 3.790 kr. hjá Hagkaupum sem er 38% verðmunur. Einnig má nefna að bókin Stangveiði á Íslandi og íslensk vatnabók eftir Sölva Björn Sigurðsson var ódýrust á 21.743 kr. hjá Nettó en dýrust á 23.990 kr. hjá Forlaginu, verðmunurinn er 10%.

Sjá töflu á heimasíðu ASÍ.
 
Eymundsson, Griffill, Mál og menning Laugavegi og Iða Lækjargötu neituðu þátttöku í könnuninni
Könnunin var gerð í eftirtöldum verslunum á sama tíma: Forlaginu Fiskislóð, A4 Skeifunni, Bóksölu Stúdenta Sæmundargötu, Nettó Akureyri, Hagkaupum Holtagörðum, Bónus Egilsstöðum, Krónunni Lindum og Samkaupum Úrval Hafnarfirði.
Hér er aðeins um beinan verðsamanburð að ræða, en ekki er lagt mat á gæði eða þjónustu söluaðila. Neytendur ættu einnig að hafa hugfast að verð á algengum bókatitlum breytast oft ört í verslunum á þessum árstíma.

Tekið af heimasíðu ASÍ

 

Fréttir thor

Kjaraviðræðum hætt

Samninganefnd ASÍ hefur á undanförnum vikum unnið að því að leggja grunn að aðfarasamningi við Samtök atvinnulífsins, þar sem þess yrði freistað að ná auknum kaupmætti, tryggja stöðugleika í efnahagsmálum og lága verðbólgu. Ágætur árangur hefur náðst um umgjörð slíks samnings. Í dag kom hins vegar í ljós djúpstæður ágreiningur við SA um launalið væntanlegs samnings, einkum það sem snýr að hækkun lægstu launa. Svo langt er á milli aðila að samninganefnd ASÍ telur forsendur brostnar fyrir þeirri leið sem átti að varða. SA hafnar þeirri kröfu ASÍ að hækka lægstu laun um ákveðna krónutölu.
 Því hefur samninganefnd ASÍ tilkynnt SA að viðræðum á þessum grunni sé hætt. Framhald viðræðna um gerð nýrra kjarasamninga er í höndum aðildarsamtaka ASÍ.

Tekið af heimasíðu ASÍ

Fréttir thor

Áskorun til allra sveitarfélaga á félagssvæði Bárunnar, stéttarfélags

Báran, stéttarfélag skorar á sveitarfélögin í Árnessýslu að fylgja fordæmi Sveitarfélagsins Árborgar og hækka ekki sínar gjaldskrár. Skilaboð allra aðila vinnumarkaðarins er að halda verðbólgu í skefjun og tryggja stöðugleika. Launafólk getur ekki eitt axlað ábyrgðina.

Read more „Áskorun til allra sveitarfélaga á félagssvæði Bárunnar, stéttarfélags“

Fréttir thor

Vinningsnúmer í happadrætti stéttarfélaganna

Dregið hefur verið í happadrætti innsendra svara vegna kjörs félagsmanna um fyrirtæki ársins 2013. Finna má vinningsnúmerin hér að neðan. Verðlaunin eru glæsilegar gjafakröfur frá Sláturfélagi Suðurlands. Annar vinningshafinn starfar hjá Lögmönnum Suðurlands og hinn hjá Veitingastaðnum við fjöruborðið. Vinningshafar eru beðnir um að hafa samband við Þjónustuskrifstofu stéttarfélaganna á Suðurlandi í síma 480-5000.

Alda Alfreðsdóttir, afgreiðslufulltrúi Samtaka sunnlenskra sveitarfélaga dró út heppna vinningshafa.

 Vinningsnúmer

1538

2240

 

Fréttir thor

Kjörís valið fyrirtæki ársins 2013

Kjörís hefur verið valið fyrirtæki ársins í árlegri könnun sem Báran, stéttarfélag og Verslunarmannafélag Suðurlands standa fyrir meðal félagsmanna sinna.

Ágæt þátttaka var í könnuninni þetta árið og greinilegt að hún vekur meiri athygli með hverju árinu. Markmið könnunarinnar er að gera það eftirsóknarvert fyrir fyrirtæki að hljóta þessa nafnbót og þá um leið að skapa sér gott orðspor á vinnumarkaði.

Fulltrúar starfsmanna og forsvarsmenn fyrirtækisins tóku á móti formönnum félaganna  í dag,  sem mættu með veglega blómakörfu og viðurkenningarskjal til staðfestingar á kjörinu.

Könnun var gerð meðal félagsmanna  varðandi aðbúnað, stjórnun, líðan og kjarasamningsbundin réttindi.

Fimm efstu fyrirtækin eru:

  1. Kjörís
  2. Landsvirkjun
  3. Sláturfélag Suðurlands
  4. Húsasmiðjan
  5. Hótel Selfoss

Á myndinni  hér fyrir ofan  eru í réttri röð: Anna Kristín Kjartansdóttir, skrifstofustjóri, Valdimar Hafsteinsson, framkvæmdastjóri, Gils Einarsson formaður Verslunarmannafélags Suðurlands, Halldóra S. Sveinsdóttir formaður Bárunnar, stéttarfélag og Guðrún Hafsteinsdóttir, markaðsstjóri.

Fyrirtæki ársins 019 Fyrirtæki ársins 017 Fyrirtæki ársins 008

 

 

Fréttir thor

44% lítilla og meðalstórra fyrirtækja ekki með skattaskil í lagi

Í Fréttabréfi ASÍ sem kom út í gær er kynnt niðurstaða samstarfs Alþýðusambandsins, Samtaka atvinnulífsins og ríkisskattstjóra varðandi  átakið „Leggur þú þitt af mörkum?“ Þar kemur fram að 44% lítilla og meðalstórra fyrirtækja voru ekki með skattaskil í lagi.

Markmið verkefnisins var að hafa leiðbeinandi eftirlit með skilum á staðgreiðslu, tekjuskráningu, vinnustaðaskírteinum, virðisaukaskattskilum og upplýsa um skyldur smærri og meðalstórra rekstaraðila. Í verkefnavali var sérstök áhersla lögð á ferðaþjónustu og aðila tengdum henni, en einnig var sjónum beint að bygginga- og verktakastarfsemi sem og starfsstöðvum sem valdar voru af handahófi.

Í átakinu voru heimsóttir 748 lögaðilar um land allt og 1896 kennitölur starfsmanna skráðar.  Farið var í 392 fyrirtæki á höfuðborgarsvæðinu og 356 á  landsbyggðinni. Niðurstaða átaksins er að verulegar brotalamir er varðandi skil á opinberum gjöldum og iðgjöldum  starfsmanna í þeim fyrirtækjum sem heimsótt voru. Þá benda þær upplýsingar sem aflað var í heimsóknunum að um svarta vinnu hafi verið að ræða í allt að 15% tilvika

Nánari upplýsingar á heimasíðu ASÍ

Fréttir Þórarinn

Hinir lægst launuðu fá minnst

Margir eiga erfitt með að ímynda sér að fólk lifi af minna en 300.000 krónur í mánaðarlaun. Ráðherrar, atvinnurekendur og fleiri eiga skiljanlega erfitt með að setja sig í þau spor. Í verkalýðshreyfingunni erum við hins vegar í daglegum samskiptum við fólk sem er einmitt að reyna þetta; að lifa af mánaðarlaunum undir 300.000 krónum. Í nýútkominni könnun sem Flóabandalagið lét gera meðal félaga sinna kemur í ljós að karlar eru með að meðaltali 298.000 krónur í dagvinnulaun en konur eru með að meðaltali 255.000 krónur í dagvinnulaun. Við þessar upphæðir bætast greiðslur svo sem vaktaálag, bónusar og yfirvinna en þrátt fyrir það ná heildarlaun kvenna ekki 300.000 krónum að meðaltali. Heildarlaun karlanna fer hins vegar í 414.000 krónur að meðaltali. 40% fólks sem hefur ekki formlega menntun á vinnumarkaði er með heildarlaun undir 300.000 krónum. Þetta er veruleiki verkafólks á Íslandi hvort sem yfirvöld og samningsaðilar trúa því eða ekki.

Það vekur áhyggjur að tillögur SA ganga út frá tveggja prósenta launahækkunum sem gerir um 4.000 króna hækkun fyrir fólkið á lægstu töxtunum. Tvö prósent fyrir fólk með hálfa milljón á mánuði er hins vegar 10.000 krónur. Tillögur SA ganga ekki út á að hækka laun þeirra lægst launuðu.

Það sem vekur enn meiri áhyggjur en afstaða SA er afstaða stjórnvalda. Engar tillögur í skattamálum eða varðandi skuldaniðurfellingu sem litið hafa dagsins ljós eru til að létta láglaunafólki lífið. Þvert á móti er verið að hækka gjöld og nefskatta í gegnum fjárlagafrumvarpið en það eru gjöld sem eru óháð tekjum og koma því hlutfallslega verst niður á láglaunafólki. Skattatillögur ríkisstjórnarinnar ganga út á að láglaunafólk fær engar skattalækkanir en því hærri tekjur sem þú hefur því betur gagnast þér skattalækkunin. Sömu sögu er að segja um nýjasta útspilið, að séreignasparnaður fólks geti nýst til að lækka húsnæðisskuldir. Gott og vel, kemur örugglega einhverjum vel en aftur er þetta aðgerð sem gagnast hátekjufólki best en lágtekjufólki minnst.

Fyrst ber að nefna að fólk með lægri tekjur er með lægri sparnað en aðrir. Í öðru lagi er fólk með lágar tekjur síður líklegt til að leggja fyrir í séreign. Í þriðja lagi er umtalsverður hópur fólks með lægri tekjur á leigumarkaði. Í fyrrnefndri könnun sem gerð var á félagssvæði Flóans er greint frá því að þriðjungur aðspurðra býr í leiguhúsnæði, 12,7% býr í foreldrahúsum en aðeins ríflega helmingur býr í eigin húsnæði. Fólk með hærri tekjur er líklegra til að búa í eigin húsnæði. Það er því ljóst að þessi aðgerð mun koma mismunandi hópum misvel. Þetta er ekki aðgerð til að auka ráðstöfunartekjur þeirra sem lægst hafa launin frekar en aðrar aðgerðir.

Í aðildarfélögum Starfsgreinasambandsins eru um 50.000 manns sem ekki hafa hlotið formlega menntun á vinnumarkaði, þetta er um helmingur starfsfólks á hinum almenna vinnumarkaði. Það er ekki ásættanlegt að allar stjórnvaldaðgerðir sem hingað til hafa verið kynntar miði að því að aðstoða tekjuhærra fólk úr greiðsluerfiðleikum. Það virðist hins vegar vera leynt og ljóst markmið stjórnvalda að einblína á einn hóp frekar en annan og auka með því ójöfnuð meðal landsmanna.

Starfsgreinasambandið hefur lagt til blandaða leið krónutöluhækkunar og prósentuhækkunar í kjarasamningum, einmitt til að tryggja að misskipting aukist ekki frekar.

Drífa Snædal

Fréttir Þórarinn

Yfirlýsing frá samninganefnd Starfsgreinasambands Íslands vegna kjaraviðræðna SGS við SA

Viðræður vegna kjarasamninga hafa nú ratað inn í auglýsingatíma sjónvarpsins með auglýsingu sem SA birti í gærkveldi. Þar er varað við hækkun launa umfram 2%. Flestir leggjast nú á eitt að koma í veg fyrir að launafólk fái launahækkanir í kjarasamningum sem eru lausir í lok mánaðarins en það er fáheyrt að samtök atvinnurekenda fari frekar í auglýsingaherferðir en að tala við samningsaðila við samningaborðið. Starfsgreinasamband Íslands lagði fram kröfur sínar um síðustu mánaðarmót og þeim var hafnað samstundis. Ítrekaðar tilraunir hafa verið gerðar til að setjast við samningaborðið með Samtökum atvinnulífsins en fátt hefur verið um svör.

Lægstu taxtar á vinnumarkaði eru 191.752 krónur. Ef launamaður hefur unnið í fjóra mánuði hjá sama atvinnurekenda má ekki greiða honum lægra en 204.000 krónur í mánaðarlaun. 2% hækkun á þessi laun þýðir hækkun um 4.000 krónur. Þetta eru tillögur Samtaka atvinnulífsins og Seðlabankans. Samtök atvinnulífsins hafa ekki verið til viðræðu um frekari hækkanir en Starfsgreinasambandið lagði fram kröfu um 20.000 króna hækkun á taxta og þykir mörgum hógvært.

Það er gömul saga og ný að í aðdraganda kjarasamninga keppist greiningadeildir, stjórnvöld og samtök atvinnurekenda við heimsendaspár verði samið um verulegur launahækkanir. Starfsgreinasambandið hefur sagt að vissulega sé launafólk alltaf til í að axla ábyrgð en við gerum það ekki ein. Stjórnvöld hafa lagt fram skattatillögur sem koma millitekjuhópum til góða en lægst launaða fólkið á vinnumarkaði fær engar skattalækkanir. Verð á vörum og þjónustu fer stighækkandi og stjórnvöld leggja á nýjar álögur á almenning í stað þess að leggja skatta á þá sem eru aflögufærir. Þegar kemur svo að kjarasamningum á lægst launaða fólkið á vinnumarkaðnum að „axla ábyrgð“. Hafa ber í huga að þeir hópar sem Starfsgreinasambandið semur fyrir verða síst varir við launaskrið, það er í þeim hópum sem betur standa. Venjulegt verkafólk er oftar en ekki á töxtum og þarf að hífa upp launin með vöktum og yfirvinnu. Í þessu samhengi verður auglýsingaherferð Samtaka atvinnulífsins um að launafólk eigi að axla ábyrgð í besta falli hrokafull og ekki til þess fallin að liðka fyrir samningum.

Það vekur sérstaka athygli að í málflutningi Samtaka atvinnulífsins er ekki vikið orði að ábyrgð atvinnurekenda eða stjórnvalda á að halda verðbólgunni í skefjum. Fyrirtæki innan SA bera ekki síst ábyrgð á því mikla launaskriði sem hefur orðið á vinnumarkaði hjá öðrum en almennu launafólki. Samninganefnd SGS fordæmir að SA skuli varpa allri ábyrgð yfir á launafólk. Starfsgreinasambandið mun aldrei gangast undir slíkan málflutning!

Samninganefnd Starfsgreinasambands Íslands

21. nóvember 2013

Í samninganefnd Starfsgreinasambands Íslands sitja 16 formenn stéttarfélaga um allt land sem fara með samningsumboð fyrir um 23.000 félagsmenn.

AFL Starfsgreinafélag

Aldan stéttarfélag

Báran stéttarfélag

Drífandi stéttarfélag

Eining-Iðja

Fréttir thor

Vel heppnaður fundur með félagsmönnum

Formaður Bárunnar og fulltrúi félagsins funduðu með starfsfólki Hótel Selfoss í gær. Fundurinn var haldinn í fundarsal hótelsins. Farið  var yfir starfsmenntamál og áherslur félagsins í kjarasamningaviðræðunum. Einnig var farið yfir orlofskosti félagsins og aðra þjónustu.  Fram kom að starfsmenn eru mjög ánægðir með starfið og vinnuandann, enda var fyrirtækið kjörið Fyrirtæki ársins 2012. Rætt var um hvernig hægt er að auka áhuga ungs fólks á að mæta á fundi hjá félaginu.  Einn félagsmaðurinn nefndi bjórkvöld sem dæmi um aðferð til að auka áhugann.

MENU