Kjarasamningsbrot og svört atvinnustarfsemi skaða ferðaþjónustuna
Eftirfarandi er tekið af heimasíðu Starfsgreinasambands Íslands:
Á sama tíma og fréttir berast af metfjölda erlendra ferðamanna til Íslands árið 2012 er ástæða til að hafa áhyggjur af fjölgun kjarasamningsbrota og undanskota í ferðaþjónustu. Þessi hegðun sem sést meðal ferðaþjónustu- fyrirtækja setur svartan blett á atvinnugreinina og kemur í veg fyrir að hæft fólk vilji starfa í greininni. Þar að auki torvelda slík vinnubrögð þeim fjölmörgu fyrirtækjum sem vilja standa rétt og vel að málum og reka sína starfsemi samkvæmt gildandi reglum á vinnumarkaði. Það er til mikils að vinna að þessi vaxtabroddur í íslensku atvinnulífi sé byggður á heiðarleika og ferðamannaiðnaðurinn leggi sitt af mörkum til samneyslunnar.
Á formannafundi Starfsgreinasambands Íslands í sumar voru málefni ferðþjónustunnar til umfjöllunar. Á fundinum lýstu formenn aðildarfélaganna verulegum áhyggjum af hversu algengt það er að starfsfólk í greininni sé svikið um rétt launakjör og önnur kjarasamningsbundin réttindi. Fjölmörg verkalýðsfélög hafa ályktað í þessa veru auk þess sem vandinn var til umfjöllunar á nýliðnu þingi ASÍ.
Við lok háannatímans í ferðaþjónustu hefur aðildarfélögum SGS borist fjöldi ábendinga um brot á kjarasamningum starfsfólks í ferðaþjónustu ásamt alvarlegum félagslegum brotum. Því miður virðast sumir atvinnurekendur í ferðaþjónustu telja sig geta brotið kjarasamninga gagnvart starfsfólki auk þess að fara ekki að lögum varðandi skattaskil og samkeppnishætti. Aðildarfélög SGS eru með fjölmörg innheimtumál í gangi gagnvart ferðaþjónustufyrirtækjum. En allt of algengt er að starfsfólki í ferðaþjónustu séu greidd laun undir umsömdum lágmarkskjörum. Þá eru ákvæði um lágmarkshvíldartíma brotin, yfirvinnu- og vaktaálög ekki greidd eða iðgjöldum til stéttarfélaga og lífeyrissjóða ekki skilað. Þar fyrir utan virðist það algengt að starfsfólki sé boðin svört vinna með tilheyrandi skerðingu réttinda. Að sama skapi eru engin gjöld eða skattar greiddir af svartri vinnu. Read more „Kjarasamningsbrot og svört atvinnustarfsemi skaða ferðaþjónustuna“
Fundur um feril kjaraviðræðna
Ríkissáttasemjara í samstarfi við helstu samtök og stéttarfélög á vinnumarkaði sem vinna að gerð kjarasamninga funduðu í dag með erlendum sérfræðingum um samningatækni og feril kjaraviðræðna. Sérfræðingur í samningatækni frá Harvard flutti erindi. Að auki kynntu fulltrúar frá stéttarfélögum í Svíþjóð, Noregi og Danmörku tilhögun og umgjörð kjarasamninga. Öll aðildarfélög ASÍ og þar á meðal Báran, stéttarfélag voru boðuð til fundarins.
Köllum til ábyrgðar þá sem standa fyrir vaxtaokri á íslenskum lánamarkaði.
Að nýloknu 40. þingi ASÍ er margt sem fer í gegnum huga manns. Á þinginu voru 290 þingfulltrúar þeirra rúmlega 100.000 launamanna sem eru innan ASÍ. Yfirskrift þingsins var atvinna og verlferð í öndvegi. Félagsmenn innan aðildarfélaga ASÍ eru starfandi á flestum sviðum samfélagsins, hjá ríki, sveitarfélögum og á almennum vinnumarkaði. Alþýðusambandið berst fyrir bættum kjörum félagsmanna sinna, kemur fram fyrir hönd aðilarfélaganna, gagnvart stjórnvöldum, atvinnurekendum, stofnunum, hagsmunasamtökum og hvers konar alþjóðlegum samtökum.
Fyrir þinginu lágu þrjú megin málefni.
- Atvinnumál, og þeim tengd mennta- og vinnumarkaðsmál.
- Húsnæðismál.
- Lífeyrismál.
Skipt var í hópa og allir þingfulltrúarnir lögðu sitt á vogarskálarnar í þeim umræðum og niðurstöðum sem lágu til grundvallar þeim ályktunum sem urðu síðan niðurstöður þingsins. Ályktanirnar sem samþykktar voru á þinginu eru samtas 7 og tekur á flestum þeim málefnum sem varða hinn íslenska launþega. Upplýsingar um þessa vinnu og ályktanir eru á heimasíðu ASÍ (www.asi.is)
Heitustu umræðurnar urðu um verðtrygginguna og tillögu Verkalýðsfélags Akranes um að afnema verðtrygginguna. Verkalýðshreyfingunni hefur verið legið á hálsi að vera talsmaður verðtryggingarinnar, hafa menn jafnvel gegnið svo langt að persónugera Gylfa Arnbjörnsson forseta ASÍ sem helsta talsmann verðtryggingarinnar. Miklar og heitar umræður urðu um þetta og sitt sýndist hverjum. Það er ekki nokkur vafi á því að öllum ofbýður það lánaokur sem viðgengst á íslenskum lánamarkaði. Það er ekkert samhengi milli þeirrar láglaunastefnu sem virðist vera viðloðandi á íslenskum vinnumarkaði og þeirra lánakjara sem í boði eru. Það er staðreynd að allar forsendur eru brostnar varðandi afborganir af lánum og launin halda engan vegin í við þær hækkanir. Því miður einkenndust umræðurnar um að kenna einhverjum um innan okkar raða frekar en að setjast niður og gera tillögur að því hvernig við nálgumst þetta mikilvæga hagsmunamál okkar allra þ.e.a.s létta þessu vaxtaokri sem við búum við. „Við viljum“ Burt með verðtrygginguna ! Þak á vexti ! Lægri vexti ! Þetta eru allt kröfur sem við getum öll verið sammála um að séu réttlátar.
En spurningin er þessi. Hvernig förum við að þessu? Þetta er ekki einfalt en upphrópanir gagnast okkur ekki neitt í þessari umræðu. Við þurfum að setjast niður og fá samnigsstöðu um þessi mál með hliðsjón af okkar eigin ávöxtunarkröfu. Skoða forsendur fyrir útreikningi verðtryggingar, eru þær forsendur eðlilegar og sanngjarnar? Þetta er stórt mál og hagsmunir lántakanda fyrir borð bornar en lánveitandi hefur alltaf pálmann í höndunum eða eins og við segjum svo oft axlabönd og belti. Hvernig getum við breytt þessu? Ekki með upphrópunum, við skulum standa saman og kalla á þá sem standa fyrir þessu vaxtaokri til ábygðar.
Halldóra Sigr. Sveinsdóttir formaður Bárunnar, stéttarfélags Selfossi.
Matarkarfan ódýrust hjá Bónus
Bónus var með lægsta verðið á matarkörfunni þegar verðlagseftirlit ASÍ kannaði verð í lágvöruverðsverslunum og stórmörkuðum á höfðuborgarsvæðinu síðastliðinn laugardag. Matarkarfan var ódýrust hjá Bónus á 16.791 kr. en dýrust hjá Nóatúni á 20.523 kr. sem er 3.732 kr. verðmunur eða 22%.
Verslunin Iceland var með næst ódýrustu matarkörfuna en þar kostaði hún 17.154 kr. sem er 2% meira en karfan hjá Bónus. Á eftir Iceland kom Krónan með matarkörfu sem kostaði 18.059 kr. sem er 8% hærra verð en hjá Bónus. Matarkarfan hjá Fjarðarkaup kostaði 18.683 kr. og var því 11% dýrari en hjá Bónus. Eins og áður segir var matarkarfan dýrust hjá Nóatúni á 20.523 kr. Verslanirnar Nettó og Hagkaup komu þar á eftir og voru 17% dýrari en karfan hjá Bónus. Kostur Dalvegi, Samkaup-Úrval og Víðir neituðu þátttöku í könnuninni.
Sjá nánar í frétt á heimasíðu ASÍ
Hvort er hagstæðara að kaupa inn á föstudegi eða laugardegi?
Við samanburð verðkönnunar sem gerð var föstudaginn 26. október og verðkönnunar sem gerð var daginn eftir, á laugardegi, kom í ljós að verð á þeirri matvöru sem verðlagseftirlitið skoðaði var nánast óbreytt. Hagkaup var eina matvöruverslunin þar sem engar verðbreytingar voru á milli daganna tveggja. Verslanirnar Kostur, Samkaup Úrval og Víðir neituðu að taka þátt.
Verðhækkanir
Af þeim matvörum sem skoðaðar voru hækkaði verðið mest á iceberg salati, blómkáli, tómötum og agúrku hjá versluninni Nettó Mjódd eða um 43% milli daga. Aðrar vörur sem hækkuðu milli daga voru t.d. Myllu hveitibrauð sem hækkaði um 12% hjá Krónunni og Holta kjúklingapylsur um 15% hjá Nóatúni.
Verðlækkanir
Mesta lækkunin á milli kannanna var á kartöflum í lausu eða um -30% hjá Nettó. Sem dæmi um aðrar vörur sem lækkuðu í verði eru t.d. Bíó bú kókosjógúrt sem lækkaði um -6% hjá Nóatúni og jarðaberja Húsavíkurjógúrtið sem lækkaði um -8% hjá Bónus.
Sjá nánari niðurstöður á heimasíðu ASÍ
Í könnuninni var skráð niður hilluverð vöru eða það verð sem neytandinn hefur upplýsingar um inni í búðinni að hann eigi að greiða fyrir vöruna. Þegar skýrt er gefið til kynna að veittur sé afsláttur af merktu verði við kassa var skráð afsláttarverð. Til að auðvelda verðsamanburð er oft skráð mælieiningaverð vöru, þar sem pakkastærðir eru mismunandi eftir verslunum.
Könnunin var gerð á sama tíma í eftirtöldum verslunum: Bónus Kringlunni, Krónunni Granda, Nettó Mjódd, Fjarðarkaupum Hafnarfirði, Iceland Engihjalla, Nóatúni Hringbraut og Hagkaupum Holtagörðum.
Verslanirnar Kostur, Samkaup Úrval og Víðir neituðu að taka þátt í verðkönnuninni, þar sem þeir telja það ekki þjóna hagsmunum sínum að verðlageftirlit ASÍ upplýsi neytendur um verð í verslunum þeirra.
Hér er aðeins um beinan verðsamanburð að ræða, en ekki er lagt mat á gæði eða þjónustu söluaðila.
Óheimilt er að vitna í könnunina í auglýsingum og við sölu nema með heimild ASÍ.
Tekið af heimasíðu ASÍ
Náms- og starfsráðgjöf
Báran, stéttarfélag býður upp á náms- og starfsráðgjöf fyrir félagsmenn. Ráðgjöfin fer fram á Þjónustuskrifstofu stéttarfélaganna á Suðurlandi. Með því að ræða við náms- og starfsráðgjafa gefst félagsmanni tækifæri til að skoða og meta eigin stöðu, til dæmis áhuga og hæfni og gera áætlun um hvert skal stefna.
- Ráðgjöf um starfsleit. Aðstoð við gerð ferilskrár og atvinnuumsókna. Góð ferilskrá getur skipt miklu máli við að ná árangri í atvinnuleit.
- Greining á áhugasviði. Áhugasviðskannanir geta hjálpað fólki við að kortleggja áhuga sinn og starfsumhverfi. Boðið er upp á áhugasviðsgreininguna Í leit að starfi. Um er að ræða spurningalista sem lagður er fyrir af náms- og starfsráðgjafa. Niðurstöðurnar gefa til kynna í hvaða átt áhuginn beinist varðandi val á námi, starfi og tómstundum. Ráðgjafinn fer yfir niðurstöðurnar strax eftir að listanum hefur verið svarað. Greiningin er félagsmönnum að kostnaðarlausu.
- Upplýsingar og ráðgjöf um námsleiðir. Veittar eru upplýsingar um nám og námskeið m.a. úrræði og styrki á vegum stéttarfélaganna. Báran, stéttarfélag styrkir félagsmenn sína til að afla sér aukinnar fræðslu.
Ráðgjöfin er félagsmönnum að kostnaðarlausu. Náms- og starfsráðgjafi þjónustuskrifstofunnar er Þór Hreinsson. Hægt er að panta viðtalstíma í síma 480-5000. Jafnframt er hægt að senda rafrænar fyrirspurnir á netfangið thor@midja.is
Um 60 trúnaðarmenn mættu á ráðstefnu
Trúnaðarmannaráðstefna var haldin á Hótel Selfossi í gær. Báran, stéttarfélag, Verslunarmannafélag Suðurlands, Félag iðn- og tæknigreina, Verkalýðsfélags Suðurlands og Félag opinberra starfsmanna á Suðurlandi stóðu í fyrsta sinn fyrir ráðstefnu af þessu tagi. Einar Gylfi Jónsson sálfræðingur hélt kynningu um samskipti og líðan á vinnustað. Sólveig Kristinsdóttir verkefnastjóri hjá Fræðsluneti Suðurlands kynnti raunfærnimat á Suðurlandi. Guðmundur Hilmarsson fjallaði um hlutverk trúnaðarmannsins á vinnustað. Að lokum var slegið á létta strengi með Sigríði Klingenberg sem ræddi um samskiptatækni.
Jafnréttisstefna ASÍ
Í dag eru liðin 37 ár frá því stór hluti íslenskra kvenna lagði niður störf og hélt geysifjölmennan útifund í miðborg Reykjavíkur til að leggja áherslu á kröfu sína um jafnrétti kynjanna Í tilefni þess kynnti ASÍ nýsamþykkta jafnréttisstefnu sína til næstu fjögurra ára í dag.
Fyrirtæki ársins 2012
Báran, stéttarfélag og Verslunarmannafélag Suðurlands standa fyrir vali á fyrirtæki ársins á Suðurlandi. Tilgangurinn með átakinu er að kanna nokkra lykilþætti hjá fyrirtækinu sem varðar félagsmenn. Könnunin mælir m.a. hversu vel svarendum líður í vinnunni, stjórnun, starfsanda og ánægju með símenntunarstefnu fyrirtækisins. Að auki verður lögð til grundvallar samskipti stéttarfélaganna við fyrirtækið vegna félagsmanna.
Könnunin var send í vikunni til allra félagsmanna og er skilafrestur til 14. nóvember nk. Valið verður kynnt við hátíðalega athöfn í lok nóvember þar sem veitt verða verðlaun og viðurkenningarskjal. Niðurstaðan verður birt á heimasíðu félaganna og send fjölmiðlum. Spurningalistinn er jafnframt happadrættismiði og verður dregið úr innsendum svörum. Í verðlaun eru tvær veglegar matarkörfur frá Sláturfélagi Suðurlands. Dregið verður þann 4. desember nk. og vinningsnúmerin síðan birt á heimasíðu félaganna.