Category: Fréttir

Jólafundur með stjórn og trúnaðarmönnum

Í gærkvöldi var árlegur jólafundur stéttarfélaganna með stjórnum og trúnaðarmönnum. Í fyrsta skipti var fundurinn haldinn sameiginlega og mættu stjórnir og trúnaðarmenn beggja félaganna til fundarins. Fundarstörf voru nokkuð hefðbundin, formenn ávörpuðu fundinn og fóru yfir starfsemi félaganna og örfáar lykiltölur svo sem félagafjölda, kynjaskiptingu  og helstu atriði í starfi félaganna. Starfsmenn þjónustuskrifstofu sögðu fram starfsemi skrifstofunnar en fyrst og fremst var tilgangur fundarins að koma saman og eiga notalega stund saman yfir góðum mat á aðventunni og gefa fólki tækifæri til að hittast og skiptast á skoðunum.

Ágæt mæting var á fundinn þrátt fyrir afspyrnuleiðinlegt veður og ástæða til að hrósa sérstaklega þeim sem lengst komu að en sem kunnugt er voru margar leiðir til og frá Selfossi illfærar sökum hvassviðris og hálku.

Fundir sem þessir eru nauðsynlegir í mörgu tilliti. Fyrst og fremst er það stjórnarmönnum nauðsynlegt að heyra í trúnaðarmönnum og ekki síður er gagnlegt fyrir trúnaðarmenn að heyra hvað félögin og starfsfólk þeirra eru að starfa hverju sinni. Stefnt er að því að þessir fundir verði haldnir sameiginlega í framtíðinni. Trúnaðarmenn voru duglegir að tjá sig um sína hlið á trúnaðarmannastarfinu og hvað er helst að gerast í þeirra nærumhverfi.

Nokkrir nýir trúnaðarmenn voru kynntir til sögunnar en félögin hafa unnið ötullega að því að efla trúnaðarmanna kerfi sín enda eru trúnaðarmenn einn mikilvægasti hlekkur milli félags og félagsmanna.

Vinningsnúmer í happadrætti stéttarfélaganna

Dregið hefur verið í happadrætti innsendra svara vegna kjörs félagsmanna um fyrirtæki ársins 2014. Finna má vinningsnúmerin hér fyrir neðan. Verðlaunin eru glæsilegar gjafakörfur frá Sláturfélagi Suðurlands. Annar vinningshafinn starfar í Hagkaup og hinn hjá Stracta hotel Hellu. Vinningshafar eru beðnir að hafa samband við Þjónustuskrifstofu stéttarfélaganna í síma 480-5000.

Vinningsnúmerin eru:

 1026 og 1442.

Tæplega 2300 félagsmenn fengu senda könnun frá báðum félögunum um Fyrirtæki ársins en aðeins 91 svar barst til baka. Svarhlutfallið var 4% sem verða að teljast vonbrigði en frá sumum fyrirtækjum, jafnvel stærri fyrirtækjum, barst aðeins eitt svar. Niðurstaða er því ekki marktæk og því ekki hægt að velja um fyrirtæki ársins að þessu sinni.

ALÞJÓÐLEGT ÁTAK UM AÐBÚNAÐ HÓTELÞERNA

Reglulega berast fréttir af opnun nýrra hótela víðsvegar um Ísland enda hefur fjöldi ferðamanna meira en tvöfaldast á síðustu árum. Það er ljóst að þessir ferðamenn þurfa að gista einhvers staðar og því kemur ekki á óvart að hótelherbergjum fjölgi. Á hinn bóginn taka fáir eftir þeim fjölmörgu starfsmönnum sem sinna hótelþrifum, en daglega þrífa hótelþernur þúsundir hótelherbergja á Íslandi. Líkt og annars staðar í heiminum eru það fyrst og fremst konur með erlendan bakgrunn sem sinna þessum störfum.  Hótelþrif er líkamlega erfitt starf sem oft er unnið undir mikilli tímapressu. Þeir sem unnið hafa við hótelþrif vita að fæstir endast lengi í slíku starfi þar sem álagið er gríðarlega mikið og það er vel þekkt að starfsfólk þjáist oft af álagstengdum verkjum og stressi.

Dagana 3. til 10. desember næstkomandi vekja stéttarfélög víða um heim athygli á vinnuaðbúnaði hótelþerna og beina kastljósinu að þessum erfiðu störfum sem unnin eru daglega á milljónum hótela um allan heim.  Markmiðið með þessari alþjóðaherferð er að opna augu hótelgesta fyrir þessum störfum en um leið þrýsta á atvinnurekendur að bæta starfsaðbúnað og starfskjör þeirra sem sinna hótelþrifum.

Erfitt og hættulegt starf
Á bakvið lúxusinnréttingar og glæsilega ásýnd hótela leynast oft á tíðum hættulegar vinnuaðstæður og mikið vinnuálag þar sem illa launað starfsfólk lyftir þungum dýnum, flytur húsgögn, þurrkar af gólfum  og innréttingum, þrífur margskonar óhreinindi og salerni. Við þessi þrif notar starfsfólk oft hættuleg hreinsiefni, eru undir mikilli tímapressu og síðast en ekki síst verða þeir oft fyrir margskonar áreitni frá hótelgestum.

Þegar stéttarfélög ræða við félagsmenn sem sinna þessum störfum er algengt að þeir kvarti undan vinnuálaginu og þeim kröfum sem gerðar eru til starfsins. Vinnuhraðinn er mikill og ávallt verið að keppa við klukkuna. Þau sem sinna hótelþrifum þurfa að þrífa ákveðinn fjölda herberga á hverjum degi. Í flestum tilfellum má lítið út af bregða til að álagið verði óbærilegt, þannig þarf ekki nema einn starfsmaður að vera veikur til að erfitt sé að uppfylla kvótann sem starfsfólki er ætlað. Í slíkum tilvikum er algengt að starfsfólk sleppi umsömdum kaffitímum til að klára vinnuna á réttum tíma.

Þetta mikla vinnuálag hefur gríðarleg áhrif á líkamlega heilsu starfsfólks og eru vinnuslys og veikindi algeng hjá þeim sem sinna hótelþrifum. Þetta hafa fjölmargar alþjóðlegar rannsóknir sýnt.  Álagið hefur aukist vegna aukinna krafa viðskiptavina, en ekki síður vegna undirmönnunar í kjölfar hagræðinga til að mæta kröfum um arðsemi.

Kynferðislegt áreiti algengt vandamál
Fyrir nokkrum árum komust vinnuaðstæður hótelþerna í kastljós fjölmiðla í kjölfar þess að Dominique Strauss-Kahn, fyrrum forstjóri Alþjóða gjaldeyrissjóðsins, var handtekinn fyrir kynferðislegt áreiti gagnvart hótelþernu á lúxushóteli í New York. Atvikið vakti mikla athygli og beindi sjónum almennings að slæmum aðbúnaði og þeim hættum sem steðja að hótelþernum á hverjum degi. Víðsvegar um heim er algengt að hótelþernur kæri kynferðislegt áreiti og annarskonar ofbeldi af hendi hótelgesta. Norrænar kannanir benda til þess að um 25% þeirra sem starfa við hótelþrif hafa upplifað kynferðislegt áreiti af hálfu gesta. Jafnvel þó engar opinbera tölur liggi fyrir á Íslandi verður að telja líklegt að ástandið sé engu skárra hér á landi.

Einföld ráð til að bæta aðbúnað
Það er mikilvægt að muna að atvinnurekendur bera ábyrgð á starfsöryggi og aðbúnaði starfsfólks síns. Eigendur hótela geta á einfaldan máta bætt það vinnuumhverfi sem hótelþernur búa við á fjölmörgum hótelum í dag og þannig minnkað líkur á vinnuslysum og veikindum:

• Starfsfólk við hótelþrif fái viðeigandi starfsþjálfun og menntun.
• Starfsfólk fái tækjabúnað, vinnufatnaði og hreinlætisvörur sem standist allar öryggiskröfur.
• Starfsfólk fái öryggisbúnað til að verjast áreiti og ofbeldi.
• Starfsfólk vinni í teymum til að dreifa álaginu og auka öryggi sitt.
• Settar séu raunhæfar kröfur á starfsfólk varðandi þann fjölda herbergja sem ætlast er til að þrifin séu á hverjum degi.
• Huga að því við hönnun hótelherbergja að auðvelt sé að þrífa þau.

Að lokum er mikilvægt að minna alla þá sem nýta sér hótel hér á landi eða annars staðar að hótelþernur og annað hótelstarfsfólk vinnur mikilvæg og oft á tíðum vanþakklát störf. Þau eru flest á lágum launum, starfa við erfiðan aðbúnað, undir miklu álagi, en þrátt fyrir það reyna þau á hverjum degi að gera vist þína eins ánægjulega og hægt er.

Hvað er jólalegra en heimagert konfekt?

Báran, stéttarfélag og Fræðslunetið halda námskeið í konfektgerð: Á þessu skemmtilega námskeiði eru útbúnir fylltir konfektmolar í konfekt mótum, handmótaðir konfektmolar, s.s. Mozartkúlur og einnig rommbrauð. Hver og einn býr til a.m.k. 20 mola. Innifalið í verði er eitt konfekt mót og pensill ásamt öllu hráefni og uppskriftahefti.

Námskeiðið er haldið í Fjölheimum Selfossi fimmtudaginn 20. nóvember kl. 18.00 – 20.50. Leiðbeinandi er Kristín Erna Leifsdóttir og er námskeiðið frítt fyrir félaga Bárunnar, stéttarfélags.

Innritun er í síma 560-2030.

Styrkir úr menntasjóðum

Báran vill vekja athygli félagsmanna sinna á menntasjóðum sem félagið er aðili að. Sjóðirnir eru til þess ætlaðir að styðja félagsmenn til ýmiskonar náms. Meðal þess sem er styrkt eru tölvunámskeið ýmiskonar, tungumálanám og þar með talið íslenskunám fyrir útlendinga, framhaldsnám, háskólanám, starfsnám og tómstundanámskeið allskonar.

Við hvetjum fólk til að kanna réttindi sín og nýta sér það sem er í boði. Hér er leið til að lækka kostnað við nám og því um að gera að láta drauminn rætast.

Atygli er vakin á að hægt er að flytja réttindi milli aðildarfélaga Starfsgreinasambandsins og einnig er hægt að nýta réttindi frá Verslunarmannafélagi Suðurlands. Starfsmenn sjóðsins sjá um að afla þeirra upplýsinga sem til þarf en félagar þurfa sjálfir að gefa upp hvaða félög þeir hafa greitt til. Ekki er til kerfi sem heldur utan um það.

Til að öðlast rétt til styrks þarf umsækjandi að hafa greitt til félagsins í minnst sex mánuði af síðustu tólf. Til að hljóta fullann styrk þarf að hafa verið greitt af sem nemur lágmarkslaunum síðustu tólf mánuði. Ef það næst ekki, til dæmis ef félagi hefur verið í hlutastarfi, þá greiðist hlutfallslega miðað við lágmarkslaun. Fullur styrkur er kr. 60.000 á hverju tólf mánaða tímabili en heimilt er samkvæmt reglum sjóðanna að reikna upp síðustu þrjú árin og sá sem hefur áunnið sér fullan rétt öll árin á þá rétt á kr. 180.000. Þetta er hægt að gera einu sinni fyrir hvern félagsmann.

Meirapróf er styrkt sérstaklega. Sá sem á fullann rétt í sjóðinn getur fengið að hámarki kr. 100.000 einu sinni. Falli hann hinsvegar undir fyrgreinda þriggja ára reglu getur styrkurinn þó orðið hærri.

Greidd eru 75% af námskeiðsgjöldum en að hámarki kr. 60.000 nema ef um starfsnám er að ræða en þá greiðast 90% af námskeiðskostnaði en að hámarki 60.000. Bóka eða efniskostnaður er ekki greiddur, aðeins námskeiðsgjöld. Það er því nauðsynlegt að fá sundurliðaðan kvittun frá fræðslustofnun.

Umsóknir með kvittunum fyrir greiðslu þurfa að berast fyrir 10. hvers mánaðar en greitt er út þ. 15. Beiðnir sem berast eftir 10. eru afgreiddar í næsta mánuði á eftir.